Депутат Мирлан Самыйкожо трибунада манас айтты

Жогорку Кеңештин жыйынында “Манас” эпосу жөнүндө” Кыргыз Республикасынын мыйзамына өзгөртүүлөрдү киргизүү тууралуу” мыйзам долбоору биринчи окууда каралды. Демилгечилер — депутаттар Мирлан Самыйкожо, Камила Талиева, Аманкан Кенжебаев, Аида Исатбек кызы.

Бул багытта мыйзам долбоорунун демилгечилеринин бири депутат Мирлан Самыйкожо маалымат берди. Ал белгилегендей, мыйзам долбоору “Манас” эпосунун үчилтигин жана анын бардык бөлүктөрүн алып жүрүүчү, сейрек кездешүүчү искусствонун улантуучусу катары манасчы статусун бекемдөө, манасчылардын чыгармачылыгын, аткаруу чеберчилигин сактоо, өнүктүрүү, даңазалоо, жайылтуу жана мамлекет тараптан колдоо максатында иштелип чыккан.

Мыйзам долбоорунда “Манас” эпосунун үчилтигине байланыштуу Кыргыз Республикасынын кызыкчылыктарын анын чегинен тышкары жерлерде коргоо ошондой эле “Манас” эпосунун үчилтигин ар тараптан окутуп-үйрөтүү жана жаш муундарды тарыхый-маданий мурастардын баалулуктары менен тааныштыруу үчүн шарттарды түзүү каралган. Ошондой эле Кыргыз Республикасынын “Манас” эпосу жөнүндө мыйзамында колдонулган “манасчы”, “манасчынын аткаруучулук өнөрү”, “эпикалык мурас”, “интеллектуалдык мурас”, “Манас” эпосун даңазалоо” терминдери киргизилет жана толукталат. Депутаттардын суроолоруна тиешелүү министрликтердик, илимий чөйрөнүн өкүлдөрү жана манасчылар жооп беришти.

Мыйзам долбоорун талкуулоодо депутат Русланбек Жакышов мыйзам долбоорун иштеп чыгууда илимий чөйрөнүн кызматкерлеринин, манасчылардын пикирлеринин эске алынуусуна көңүл бурду. Депутат Балбак Түлөбаев Манасты иретке келтирүү, манасчылыкты даңазалоо максатындагы мыйзам долбоорун колдоого алды. Депутат Сүйүнбек Өмүрзаков Манас үчилтигиндеги башка каармандардын ысымын спирттик ичимдиктерге колдонууга каршылыгын билдирип, өкмөттү идеологиялык багыттарга көңүл бурууга чакырды. Депутат Гүлшаркан Култаева мыйзам долбоорунда каралган Манас эпосун ар тараптан үйрөтүү жагдайына кызыкты. Депутат Марат Мураталиев мамлекеттик сыйлыктардын катарына “Кыргыз Эл манасчысы” өзүнчө наамын киргизүү сунушун айтып, Талас облусундагы Манас ордо комплексинин жетекчисин дайындоо маселесин көтөрдү. Депутат Динара Ашимова мыйзам долбоорун колдоого алып, бул багытта көпчүлүктүн катышуусу менен парламенттик угуу өткөрүү сунушун берди.

Ошондой эле жыйында Министрлер кабинетинин төрагасы тарабынан демилгеленген “Манас” эпосу жөнүндө” Кыргыз Республикасынын мыйзамына өзгөртүүлөрдү киргизүү тууралуу” мыйзам долбоору да каралып, биринчи окууда кабыл алынды.

Бул багытта депутаттарга маданият, маалымат, спорт жана жаштар саясаты министринин орун басары Гулбара Абдыкалыкова маалымат берди. Мыйзам долбоорунун максаты материалдык эмес маданий мурас чөйрөсүндөгү коомдук мамилелерди өркүндөтүү болуп саналат. Гулбара Абдыкалыкова Министрлер кабинетинин төрагасы демилгелеген мыйзам долбоору депутаттар тарабынан демилгеленген мыйзам долбооруна көпчүлүк жактан окшош болгондуктан, экинчи окууда кароодо бириктирүүгө даярдыгын билдирди.