Кечээ, 29-ноябрда «Манас» эл аралык аэропортунун басма сөз кызматы маалымат таратып, дүйнөдөгү эң чоң учак Кыргызстанга конгонун билдиришкен. Коомчулукта ал учактын эмне үчүн Кыргызстанга конгону суроо жаратты.
СЕРЕП МЕДИА маалымат агенттигине аэропорттон комментарий беришти. Маалыматка караганда, учак техникалык токтотуу жасаган. Бул учактын аэропортто 24 саатка чейин токтой турганын билдирет. Бирок андан эч нерсе түшүрүлбөйт жана жүктөлбөйт. Ачык булактардан белгилүү болгондой, бул май куюу же экипажды алмаштыруу үчүн кыска токтотуу болушу мүмкүн.
Ан-225 «Мрия» — дүйнөлүк авиациянын тарыхындагы эң чоң жана жүк көтөрүүчү учак жалгыз гана нускада бар. Авиация майы менен толук толтурулганда 15 миң чакырымдан ашык аралыкты басып өтө алат. Учак Киев механикалык заводунда 1984-1988-жылдары долбоорлонгон жана жасалган. Ал биринчи жолу 1988-жылы 21-декабрда учкан. Ан-225 учагынын курулушуна көп жолу колдонулуучу «Буран» космостук кеме долбоору үчүн аба транспорт системасын түзүү зарылчылыгы себеп болгон.