Төрага Талант Мамытов элдин башын айлантып жатат. Мындай оюн бүгүн парламент отурумунда депутат Ирина Карамушкина билдирди.
Эске сала кетсек, бүгүн парламенттин жалпы жыйынынын күн тартибине Баш мыйзамдын жаңы редакциясы боюнча референдумду дайындоо мыйзам долбоору коюлган. Көпчүлүк депутаттар жаңы редакция боюнча сын-пикирин айтышууда. Алардын айтымында, документтин текстинин кыргызча вариантында бир бетте эле 8ден ашык ката бар. Ошондой эле аны кабыл алуунун өзү мыйзам бузуулар менен жүргөнүн айтышууда. Ага катар эл өкүлдөрү мыйзам долбоорунун авторлору катары көрсөтүлгөн 80 депутат кимдер экенин сурап, жооп ала албай коюшту.
Төрага Талант Мамытов талкууга жаңы баш мыйзам эмес, референдум дайындоо маселеси коюлганын айтып, депутаттарды Конституция тууралуу суроо бербөөгө чакырды. Ирина Карамушкина буга каршылыгын билдирди.
«Азыр сиз референдум өткөрүү-өткөрбөө маселесин карап жатканыбызды айтып жатасыз. Бирок беренелердин бирине референдумда «КР Конституциясы тууралуу мыйзамдуу кабыл алуу керекпи?» деген суроо коюларын көрсөткөнсүздөр. Башкача айтканда, ал референдумда Баш мыйзам кабыл алынат. Мен сиз депутаттарды жана элди адаштырып жатасыз деп эсептейм! Так ошол референдумда Конституциянын жаңы долбоорун кабыл алганы жатасыңар!» — деди ал.
