СЕРЕП МЕДИА маалымат агенттигине Сузак районунун тургуну Сурма Сидикова кайрылып, мындан 22 күн мурун 10 жаштагы ДЦП менен жабыркаган небереси Кудайберди Тургунбаев Бишкектеги балдар ооруканасында операциядан кийин каза болгонун билдирди.
Таененин айтымында, небересин кызынын көзү өткөндөн кийин жалгыз багып келе жаткан.
«Неберем ДЦП менен жабыркачу. Бир буту ичине кирип турчу. Мен деле карып калдым, акыбалым жакшы кезде неберемдин бутун түздөө боюнча операция кылдырып алайын деп оорукана издей баштагам. Ташкентте операциянын баасын 6 миң доллар дешти, бирок менде андай акча жок болгондуктан, борборго келе бердим.
Бишкектеги балдар ооруканасында операция кылышты. «Оор операция» деген, бирок 40 мүнөттө эки бутуна тең операция жасап, гипстеп коюшуптур. Неберем өзүнө келе албай жатты. Ошол боюнча бизди дарыгерлер караган жок. Кечинде «апалап» жатты. Мен «карап койгулачы, неберем өлгөнү жатат» дедим. Ошол күнү саат 04:00 чамасында дарыгер келип, оозун ачканда эле үзүлүп кетти»,- деп ыйлаган эне эми жалгыз калганын айтты.
«Арыз жазсам неберемди кескилишет эле да, кыйнагым келген жок»,- деген таене милицияга арыз жазбаганын айтты.
Редакция бул боюнча Саламаттыкты сактоо министрлигине караштуу Эне жана баланы коргоо улуттук борборунун жетекчиси Шайирбек Сулаймановго байланышканыбызда, комиссия иштеп жатканын айтты.
«Учурда бул факты боюнча 7-8 кишиден түзүлгөн комиссия иштеп жатат. Документтин баары комиссияда, ошол үчүн комментарий бере албайм. Жыйынтыгы чыккан соң маалымат берилет»,— деди ал.
Посмотреть эту публикацию в Instagram
