Жалпы республикалык тестирлөөгө катышуу үчүн 9-апрелге чейин каттоодон өтсө болот. Бул тууралуу билим берүү жана илим министрлигинин мектептен сырткары билим берүү бөлүмүнүн башчысы Марат Үсөналиев пресс-конференция учурунда билдирди.
Маалыматка ылайык, быйыл мектепти 58 237 бүтүрүүчү аяктап жатат.
«ЖРТны жогорку окуу жайларына тапшырууну каалаган мурунку жылдардагы бүтүрүүчүлөр да тапшыра алышат. Тестирлөө ыктыярдуу, бирок Кыргызстандын ЖОЖдоруна кирүүнү каалаган жарандар сынактан сөзсүз өтүшү керек», — деди ал.
Билимди баалоо жана окутуу усулдары борборунун атайын сайты аркылуу дагы катталса болот. Быйылкы бүтүрүүчүлөрдү каттоо окуган жери боюнча, өткөн жылдардын бүтүрүүчүлөрү жашаган жери боюнча райондук же шаардык билим берүү бөлүмдөрүндө жүргүзүлөт.
«Бардык керектүү документтерди тапшыргандан кийин, бүтүрүүчүлөр атайын маалымдама алышат», — дейт Билим берүү жана окутуу усулдарын баалоо борборунун талдоочусу Инна Валькова.
ЖРТ үчүн баалар негизги тест үчүн жана ар бир тандалган предмет үчүн 370 сом. Тестирлөө 17-майдан 23-майга чейин өткөрүлөт.
