Бүгүн, 9-апрелде Бишкек шаардык соту журналист Канышай Мамыркулованын бөгөт чарасын карап, камакта калтырды. Соттук отурумга Мамыркулова жеткирилди.
20-мартта журналист Канышай Мамыркулованын кармалганы маалым болгон.
22-мартта Бишкектин Свердлов райондук соту журналистти эки айга камоо чечимин чыгарган. Бөгөт чарасынын мөөнөтү 19-майга чейин деп аныкталган.
Сот отуруму жабык өтүп, ага адвокаттан башка жакындары, кызы дагы киргизилген эмес.
Бишкек ШИИБдин милиция кызматкерлери тарабынан массалык башаламандыкка чакырыктарга жана улуттар аралык кастыкты козутууга шектүү кармалганын билдирген.
“Социалдык тармакта мониторинг жүргүзүү учурунда, Фейсбук социалдык тармагынан кыргыз-тажик чек арасы боюнча жалган маалыматтарды таратып, коомдук-саясий кырдаалды туруксуздаштыруу менен Кыргыз Республикасынын аймагында массалык баш аламандыктарды уюштурууга багытталган чакырыктарды, ошондой эле коңшу өлкөлөрдүн жана Кыргыз жарандарынын ортосундагы улуттар аралык кастыкты козуткан аракеттерди жасаган Канышай Мамыркулова аттуу колдонуучу аныкталган.
Маалымат соттук-лингвистикалык экспертизанын корутундусу менен тастыкталып, борбордук милициянын Тергөө кызматы тарабынан Кылмыш-жаза кодексинин 278-беренеси (Массалык башаламандыктар) менен кылмыш кылмыш иши козголгон. Козголгон кылмыш ишинин алкагында 1975-жылы туулган шектүү аныкталып, убактылуу кармоочу жайга киргизилди.
Ушул эле жаран мурда орун алган кыргыз-өзбек республикаларынын ортосундагы чек ара маселелери боюнча дагы коомчулукту адаштырып, коомдук-саясий кырдаалды курчутуп, ал боюнча дагы учурунда жоопкерчилиги каралган. Учурда бул кылмыштуу аракеттерге катыштыгы бар атуулдарды аныктоого багытталган тергөө жана ыкчам-иликтөө иштери улантылууда”, — деп айтылган милициянын маалыматында.
