УКМК төрагасы Камчыбек Ташиев Жогорку Кеңештин комитет жыйынында Төрт-Көчө тууралуу маалымат берди.
«Төрт-Көчө боюнча мурдагы өлкө жетекчилери ката кетирген. Кандай ката? Коомчулукка айтып коёюн, Төрт-Көчөнү мурдагы Коопсуздук кеңешинин катчысы Адахан Мадумаров ошол кездеги президент Бакиевдин тапшырмасы менен протоколго кол койгон. Биринчиден, ал киши ошондогу кызматы менен чек ара боюнча протоколго кол коюуга конституциялык мыйзамдуу укугу болгон эмес.
Экинчи стратегиялык ката – 275 метр жерди “тажиктердин жери” деп таанып, аны “49 жылга кыргыз тарап ижарага алат” деп кол койгон. Чек ара тилкеси жакын жайгашкан аймактарды чек ара маселесине чекит коюлмайынча кайсы бир жактыкы деп аныктабаш керек. Ижарага алганы – “бул силердин жер” деп моюндаганы. Андан бери 20 жыл өтүп кетти, дагы 29 жылдан кийин “бул биздин жер, ижарага алган мөөнөтүңөр бүттү” деп кууп чыгышмак. Ошол кездеги жетекчилик параллелдүү-зеркалдык кадамга барышы керек эле: Төрт-Көчөнү ижарага алыштыбы, демек, биз силерге Ходжаи-Ворух көчөсүн ижарага берели деш керек болчу. Ошону менен ал жол биздики деп таанылып калмак.
Мурдагы өлкө жетекчилиги маселени убактылуу чечүүнү каалашкан. Чек ара маселесин чечүүдө тажик тарап ошол протоколду дайыма бетине кармап келди. Бир колдун туура эмес коюлушу: 55 аскер кызматкеринин өлүмүнө, 121 аскер кызматкеринин ар кандай жараат алышына, 63 жай тургундун каза болушуна, 253 жай жарандын жараат алышына, деги эле миңдеген адамдардын жабыркашына алып келди.
Төрт-Көчө боюнча протоколго кызматтык милдети туура келбеген адам кол койгонун, демек, юридикалык күчү жоктугун билдирсек, алар “анда эмне үчүн ал адамды жоопко тартпайсыңар?” деген суроо беришти. Ошол 275 метр жолду нейтралдуу макамга алып келүү үчүн Адахан Мадумаровго “мамлекеттик чыккынчылык” беренеси менен кылмыш ишин козгоого туура келген.
Мына, чыккынчылыктын өзөгү кайда жатканын билип алыңыздар. Бул берененин мөөнөтү жок, азыр да камап койсо болот»,- деди ал.
