Башкы прокуратура Курманкул Зулушевдин Жазык-укуктук системаны реформалоо боюнча жумушчу топтун отурумунда айткан сөздөрү боюнча үн катты.
Алардын айтымында, башкы прокурор жасалган кылмыш үчүн жазык жоопкерчилигинин болбой койбостук принцибинен баш тартууну эмес, жазанын катаалдыгы боюнча пикирин билдирген.
«Жазык-укуктук системаны реформалоо боюнча жумушчу топтун отурумунда Башкы прокурор өлкөбүздө жарандар салт боюнча менталитетке жараша никелешип, мыйзам талаптарын эске албастан үй-бүлө курган учурлар кездешерине токтолуп, «эгер 17 жашар кыз төрөп, үй-бүлө куруп, жолдошу менен жашап калса, тергөө анын жолдошунун аракетине юридикалык баа берет. Бул аракет үчүн 7 жыл 6 айдан 10 жылга чейин эркинен ажыратуу жазасы каралган. Мындай учурларда улуттук менталитет менен салтты эске алуу зарыл деп эсептеймин» деген.
Бирок, Башкы прокурордун жогорудагы сөздөрү айрым массалык маалымат каражаттарынын өкүлдөрү тарабынан туура эмес интерпретацияланып калган.
Алсак, 24.kg жана Kaktus.Media Курманкул Зулушевдин сөздөрүнөн айрым контекстерди кесип алып, айтылган ойду жашы жете электерге карата жасалган жыныстык мамилени чечүүнүн мүмкүнчүлүгү катары көрсөтүшкөн. Өз сөзүндө Башкы прокурор жасалган кылмыш үчүн жазык жоопкерчилигинин болбой койбостук принцибинен баш тартууну эмес, жазанын катаалдыгы боюнча пикирин билдирген.
Башкы прокуратура маалыматтардын туура эмес жеткирилиши коомчулуктун арасында түшүнбөстүктү жаратып, мамлекеттик бийликтин ишмердүүлүгүн дискредитациялоого алып келээрин маалымдайт»,- деп айтылат маалыматта.
