БУУнун Коопсуздук Кеңешинде Ооганстан боюнча 21-июнда жыйын өттү. Кыргыз Республикасынын БУУдагы туруктуу өкүлү Аида Касымалиева өз сөзүндө Кыргыз Республикасы Ооганстандын тынч жана стабилдүү болушуна кызыкдар экенин, коңшулук жакшы мамилелерди өнүктүрүүгө жана ооган элине жардам колун сунууга даяр экенин белгиледи. Мындан тышкары, Ооганстандын экономикасын аймактык процесстерге интеграциялоонун, анын ичинде Ооганстан аркылуу Түштүк Азия өлкөлөрүнө электр энергиясын экспорттоо боюнча CASA-1000 долбоорун ишке ашыруунун маанилүүлүгү белгиленди.
Жыйынга ошондой эле БУУнун Башкы катчысынын Ооганстан боюнча атайын өкүлү, БУУнун Ооганстанга жардам көрсөтүү миссиясынын башчысы Роза Отунбаева катышып, Кеңештин мүчөлөрүнө ал өлкөдөгү кырдаал тууралуу маалымат берди.
