«Кыргызпатент» чыгармалары радио, теледен кеткен авторлорго издөө салып 1012 автордун тизмесин жарыялады. Анын арасында маркум ырчы, аткаруучулар да бар. «Кыргызпатент» берген маалыматка ылайык, мекемеде аталган авторлордун байланышуу номерлери жок болгондуктан гонорарлары төлөнүп бериле элек.
Узун тизмекте ырчылар Мелис Абдрашитов, Назира Кадыева, Нурбек Савитахунов, Нурайым Азыкбаева, Эрлан Андашев, Мурадил Данияров, Гүлжигит Калыков, Кундуз Канатбек кызы, Жамил Карабалев жана башкалар, куудул Эрнест Бөрүбаев, Эльдияр Кененсаров, маркум куудул Рахман Разыков жана башкалар бар. Ошондой эле тизмеден мурдагы президент Алмазбек Атамбаевди табууга болот. Атамбаев 2016-жылы «Судьбе на зло» аттуу ырын ырдап, клип чыгарып чыгармачылык талантын тартуулаган.
