Бүгүн, 22-мартта адвокат Шердор Абдыкадыров СЕРЕП МЕДИА агенттигине Бакай-Ата конушундагы бейтапкананын дарыгерлери пенсионерди кабыл алуудан баш тартып, аны иш бөлмөдөн түртүп чыгарып салышканын айтып, окуянын видеосу менен бөлүшкөн эле.
Бул окуядагы экинчи тараптын оюн угуу үчүн СЕРЕП МЕДИА агенттиги Бакай-Ата конушундагы бейтапкананын дарыгери, тактап айтканда дал ошол видеодо «катталгыла, анан келгиле» деп эшикти жаап алган Динара Жумагулова менен байланыштык.
Анын айтымында, видео бул окуянын аягындагы үзүндү. Ал бул окуядан кийин кан басымы жогорулап жатканын, мындан ары бул бейтапканада эмес, Кыргызстанда иштөөдөн баш тартып жатканын айтты.
«Ал айым биздин бейтапканага келгенде эле ачууланып келген. Ошол окуядан кийин кан басымым жогорулап жатат. Мен учурда жумушум боюнча окуудан өтүп жаткам. Күнүгө саат 14:00гө чейин окуйм. Андан кийин гана бейтаптарды кабыл ала баштайм. Ошол күнү бейтапканага окуудан суранып эртерээк келгем, себеби мен башка бейтаптарды текшеришим керек эле. Отурсам эле эже кирип келди. Мен кабыл алуу баштала элегин айттым. Бирок ал буга чейин ооруканада дарыланып чыкканын айтып уруша баштады. Видеодо деле көрүнүп турат. Мен ал учурда ак халатымды да кийе элек болчумун. «Макул» дедим. Кабыл алайын деп карточка ачтырып, ЭКГга түшүрдүк. Ошол учурда менин телефонума “жаңы төрөлгөн ымыркай” деген чалуу келип калды. Мен ымыркай балдары бар апаларга бошобой жатсам да дароо жооп берүү үчүн дайыма ушинтип сактайм. Болбосо, алар чалып жатканда албай калышым мүмкүн. Ал эми ымыркайга тезинен жардам керек болуп калышы мүмкүн да. Ошол учурда чалган келиндин 25 күндүк наристеси бар болчу. Ага кеңеш берип жаткам. Бирок мен телефон менен сүйлөшүп жаткан учурда бейтаптын карточкасын толтуруп жатышкан. Анан эле ызы-чуу чыгарды. «Эшикте күтүп туруңуз, азыр кабыл алам» дедим. Бирок ал провокация кылды. Телефонуна тарта баштады. Анан мен аны эшикте күтүп турсун деп «каттоодон өтүп, анан келиңиз» дедим. Мен видео тарагандан кийин директорго кирип, иштебейм деп арыз жаздым. Арызды каттаттым. Бирок директор «сенин ордуңа киши тапкыча иштеп турасың» деди. Мен эми Кыргызстандан кетүүнү ойлоп жатам. Бул жерде иштебейм. Орусияга кетем. Мен да өз укугумду коргогум келет. Менин да чындыгым бар”, — деди ал.
