Акыйкатчы Жамиля Жаманбаеванын кайрылуусунан кийин психиатриялык ооруканалардагы бейтаптардын күнүмдүк тамак-ашына бөлүнгөн акча эки эсеге көбөйдү. Бул тууралуу Акыйкатчы институтунан билдиришти.
Жамиля Жаманбаева психиатриялык ооруга чалдыккандар камкордукка жана жардамга муктаж жарандар экенин белгилеп, алардын укуктарынын сакталышына өзгөчө көңүл бөлүп келет.
«Изилдөө учурунда бейтаптардын тамак-ашынын сапатынын начар экендиги аныкталган. Бишкек шаарындагы Республикалык психиатрия жана наркология борборунда 1 бейтаптын 1 күндүк тамагына 96,25 сом сарпталат. Ал эми, Чым-Коргон айылында жайгашкан Республикалык психиатриялык ооруканада 1 бейтаптын 1 күндүк тамагына 65,70 сом бөлүнөт. Бул сумма бейтаптарды пайдалуу, организмди керектүү заттар менен чыңдай турган тамактар менен камсыздоого жетпейт»,- деп айтылат маалыматта.
Акыркы жылдардагы азык-түлүккө баанын өсүүсүнө карабай, бейтаптардын тамак-ашына бөлүнгөн каражаттын өлчөмү 2017-жылдан бери өзгөргөн эмес.
Жамиля Жаманбаева бейтаптардын тамактануусуна акчаны көбөйтүүнү сунуштап Министрлер кабинетинин төрагасына кат жолдогон. Акыйкатчынын сунушунун негизинде, 2025-жылдын апрель айынан тарта Бишкек шаарындагы Республикалык психиатрия жана наркология борборунда 1 бейтаптын 1 күндүк тамак-ашы 180 сомго, ал эми, Чым-Коргондогу Республикалык психиатриялык ооруканадагы 1 бейтаптын 1 күндүк тамак-ашы 130 сомго чейин жогорулады.
