Пандемия экономикага өтө терс, күчтүү сокку урду. Туристтер жок, көп жумуш орундар бош турат. Бирок сабыр кылалы. Кайдыгер болбойлу. Буюрса, жакшы турмуш да келет. Мындай оюн Финполдун мурунку жетекчиси, учурда Ысык-Көл облусунун прокурору Сыймык Жапыкеев Фейсбуктагы баракчасына жазды.
Ал Орозо айында колдон келишинче бири-бирибизге жардам берүүгө, бири-бирибизге зомбулук көрсөтпөөгө чакырды.
«Урматтуу достор, баарыңарды Орозо айы менен куттуктайм, ыйман жүрөгүбүзгө кирсин. Биз негизи эле Кудай колдогон элбиз. Кыргыз элинен суранып, кайрылат элем, ушул айда колдон келишинче бири-бирибизге өзгөчө жардам берели. Кылмыш кылбай, бири-бирибизди сабап, зомбулук көрсөтпөйлү. Орозо болбосо да, зомбулук көрсөтпөсөк. Достор, интернетти ачсак эле, тиги тигини муунтуп салды, өлтүрүп салды, үй-бүлөлүк зомбулук эле, башка эч нерсе жок. Кыргыз элим каякка баратабыз? Бүт жерде интрига, ушак, басмырлоо, бузукулук, жөн үй-бүлө да кура албай, жөн үйлөнө албай, ала качмай, болбой калса өлтүрүп салмай, мас болуп жол кырсыгына кабылмай… Достор, мунун баарын токтотуш керек.
Түшүнөм, пандемия экономикага өтө терс, күчтүү сокку урду, туристтер жок, көп жумуш орундар бош турат. Бирок сабыр кылалы. Кайдыгер болбойлу. Жакшы турмуш да келет буюрса.
Эми достор, бул видео тууралуу, баары башкача. Биринчиден, мени бүт облус жетекчилиги, прокуратура жамааты жакшы тосуп алышты, буюрса облустун маселелери менен таанышып атабыз. Облустун губернатору болом деп чуркаган же ойлонгон эмесмин, өзүмдүн эле жумушум жакшы, мыйзамдуулук, адилеттүүлүктү облуска иштетсек, элдин керегине жарасак да жаман иш эмес. Калптын чеги болбойт экен. Ушинтип эле мени жамандап бүтпөй коюшту. Буюрса, көлдү тегеренип, эл менен түздөн-түз кезигебиз, көйгөйлөрүн облус жетекчилиги менен угабыз. Достор, сак саламатта болуңуз. Эл үчүн иштегенге даярбыз», — деп жазды ал.
Буга чейин басылмалардын бири Сыймык Жапыкеев Финполдогу «креслосунун» ордуна башка жумуш издей баштаганын, Ысык-Көл облусундагы эмгек жамаат Жапыкеевди кабыл албай койгону тымызын айтылып келгенин, ал чоң кызматты эңсеп турганын, жакынкы арада аны чоң кызматтан көрүшүбүз мүмкүн экенидигин айтышкан эле.
