Мамлекеттик коопсуздук комитетинин төрагасы Камчыбек Ташиев уюшкан кылмыштуу топтор менен күрөш баштагандан кийин өзүнө жана үй-бүлөсүнө коркутуулар болгонун журналисттерге 20-ноябрда билдирди.
Ташиевдин айтымында, кечээ ал иш сапардан кайтып келгенден кийин дароо анын почтасы аркылуу пакет келгенин билдиришкен. Кат кимден жана кандай жол менен анын үстөлүнө жеткени белгисиз. Алгач катты айрып салган, бирок кийин кайра кагаздарды чогултууга туура келген.
«Катта бир нече жолу «Жеке Камчыбек Кыдыршаевичке» деп жазылган, ал эки-үч жолу оролгон экен. Ичинде флешка бар конверт болгон. Бул катты ким калтырганын аныктоо чоң кыйынчылыкты туудурбайт. Президенттин тапшырмасы менен тергөө жүрүп жатат», — деп айтты Ташиев.
УКМКнын төрагасы флешканы журналисттерге экинчи жолу көрсөтүп жатканын, биринчи жолу президентке көрсөткөнүн белгиледи. Андан кийин каттын мазмуну тууралуу айтып берди. Президенттин тапшырмасы менен Башкы прокуратурага, ИИМге жана УКМКга иликтөө жүргүзүү боюнча тапшырма берилген.
«Президент аны көрүп чыгып, иликтөөнү жана изилдөөнү буйруду. Президент анын мазмуну коомчулукка белгилүү болушу керектигин айтты. Эгер мага, президентке же биздин үй-бүлөлөрүбүзгө бир нерсе болуп калса, бул маалыматты эл билиши керек. Катта мен алардын шарттарын аткарышым керектиги жазылган, антпесе алар мени же үй-бүлөмдү жок кыла турганын айтышкан. Бул жерде түздөн-түз коркутуулар бар. Бул ыкмалар атайын кызматтардын же алардын кызматкерлеринин иштөө методикасы экени ачык көрүнүп турат. Аларга ишкерлер жана криминалдык авторитеттер чоң суммадагы акча төлөгөн. Бир таразага менин жана үй-бүлөмдүн коопсуздугун, экинчи таразага алардын каалоолорун коюп коюшкан. Мен уюшкан кылмыштуу топтор жана башкалар менен күрөш баштаганда мындай коркутуулар боло турганын билгем. Алар мага басым жасайт деп билгем, бирок мен күрөштөн баш тартпайм.
