Эверест чокусун багындырууга аракет кылган жеке ишкер Рысгүл Акимжанов социалдык тармактагы баракчасында орто жолдон артка кайтканын жазды.
«Ар бир кишиге 6 баллон кислород алганбыз. Мага 6 кислород жетпей калып, чокуга чыгып бара жаткан жерден (8400 метрден) так орто жолдон кайтарышты. Базада тургандар аба ырайын, ар бир альпинисттин ар бир кыймыл аракетин, ал акыбалын көзөмөлдөп турушат.Жарым жолдон мени кайра кайтарышты, анткени ашыкча кислород албагандыктан, мендеги кислород менен чокуга жетишин жетип алып, кайра түшкөнгө кислород калбай калмак.
Ага чейин 3 күн бою ашказан тамак кабыл албай туруп алды. 4-базада ашказан бош болсо деле кусуп туруп алды. Ошого байланыштуу кислородду 2-2,4 эмес, энтигип жатып 3 шкала менен колдоно баштадым. Штурм болгондо 3 шкала менен кеттим. 3 шкала менен чокуга жетмекмин, бирок базадагылар караманча каршы туруп алышты. «Түшө бериште аба ырайы бузулат, 3 шкала менен 4-базага жеткен менен андан ылдый түшө албайсын» дешти.
Белгилүү альпинист Владимир Котляр «ашыкча кислород алып ал!» деп кеңеш берген, бирок «6 баллон жетет» деп өзүмө ишенип алганыма абдан өкүндүм. Анын үстүнө менин буюмдарым штурмга жарым саат калганда гана барып, шашып даярдангыча да демигип, ашыкча дем алып, ошого да кетип калды.
Кислород жок тоодо бир дем алганыңды эсептеп, карап, контролдоп турасын. Ашыкча дем алсан, анда кислороддун канчалык колдонулганын карап турасын. Ошентип, ашказандын айынан бир баллон кислород пландан тышкары ашыкча колдонуп кетип, аным жалпы жыйынтыкка таасирин берди. Бирок чыныгы тозок 4-базага кайтканда болду. Эмне үчүн «чокудан эмес, 4-базадан ылдый түшкөн маанилүү» деп титрешкенин ошол жерде көрдүм. Өмүр үчүн күрөштүм. Ошол түнү мен тирүү калам деп ойлогон эмесмин… Азыр да эстесем денем дүркүрөйт. Бир түндө бир нече өлүм көрдүм, кечээ жаныңда отурган киши эртең менен тирүү эмес… Дагы жакшы мен алардын арасында эмесмин.
Ошентип, жашоомдогу бир айлык кызыктуу окуялар бүттү, эми мындан да кызыктуусу башталат»,— деп жазды ал.
