Буга чейин укук коргоочу Назгүл Турдубаева Бишкекте мектепке такыр барбаган 9 жаштагы бала бар экенин, анын документтери жок экенин айтып, мэрия аны мектепке киргизүүгө жардам бериши керектигин билдирген. Бишкек мэриясы 9 жаштагы баланын абалы тууралуу төмөнкүлөрдү билдирди:
— Бишкек шаарынын Биринчи май райондук социалдык өнүктүрүү башкармалыгынын үй-бүлөнү жана балдарды колдоо бөлүмүнүн кызматкерлери №14 МАБдын социалдык адиси менен биргеликте жашы жете элек баланын жашаган жерине барышып, бала энеси жагынан туугандарыныкында жашагандыгы белгилүү болду. Тууганы жашы жете элек бала Ысык-Көл облусунун Жети-Өгүз районундагы Чоң Кызыл-Суу айылында жашаган эжесинин уулу экенин айтты. Жашы жете элек баланын атасы Ысык-Көл облусунун Жети-Өгүз районунун Барскоон айылынан. Агасынын айтымында, 2014-жылдан бери жашы жете элек баланы багып алуу максатында багып келет. 2021-жылы баланын атасы аны мектепке киргизүү максатында Ысык-Көл облусуна алып кеткен. Бирок жашы жете элек бала Чолпон-Ата шаарында жайгашкан реабилитациялык борборго түшкөнү белгилүү болду. Кийинчерээк ал жерден аялы экөө жээнин алып кетишкен. Баланын туулгандыгы тууралуу күбөлүгү жок, ал эми тууганынын убактылуу паспорту жок болгондуктан, камкордукка алуу мүмкүн болгон эмес. Демек, жакындары буга чейин бир дагы мамлекеттик мекемеге кайрылышкан эмес. Ошондой эле жашы жете электин таякеси 2021-жылдан бери Бишкектин Биринчи май районунда жашап жатканын түшүндүрдү. Баланын тиешелүү документтерин тариздөө жана аны жалпы билим берүүчү мектепке жайгаштыруу боюнча маселелерди чечүү максатында материалдар Бишкек шаарынын мэриясынын Биринчи Май райондук администрациясынын Балдар иштери боюнча комиссиясынын кароосуна жиберилди.
