Баңгизат сатууга аракет кылган Кыргыз жарандары кармалды. Бул тууралуу УКМКдан билдиришти.
28-майда УКМК тарабынан Кылмыш-жаза кодексинин 282-беренесинин 2-бөлүгүнүн 2-пункту (баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча Кылмыштардын бирдиктүү реестрине катталган сотко чейинки өндүрүштүн алкагында кыргыз-өзбек мамлекеттик чек арасына жакын Кара-Суу шаарынын аймагында баңгизатын мыйзамсыз жүгүртүү учурунда Кыргыз жараны кармалган. Ал мурда соттолгон жана Өзбекстанда баңгизаттарын жүгүртүүгө катышкандыгы үчүн жазасын өтөп келген.
Алынган баңгизатынын салмагы 1 килограмм 718 граммды түзүп, жүргүзүлгөн экспертизанын жыйынтыгында кара куурай чайыры (гашиш) экени аныкталган. Мындан тышкары, ошол эле күнү 1984-жылы туулган дагы бир жаран кармалды. Анын үйүн тинтүү учурунда жалпы салмагы 75 граммды түзгөн сары-ак түстөгү зат табылган, экспертизадан героин экени такталды. Жогоруда аталган жарандар УКМКнын тергөө камак жайынын убактылуу кармоочу жайына жайгаштырылган.
