Кечээ, 9-октябрда социалдык тармакта зомбулукка туш болгон кыздын видеосу тарады. Маалыматка караганда, окуя 5-октябрда болгон. Манас шаарындагы батирлердин биринде аны көп убакыттан бери коркутуп келген жаран адаттагыдай сабап салган.
«Ал жигит мага 7 ай мурун үйлөнүү максатында мамиле кылып жүргөн, бирок анын сунушуна макул эмес экенимди билдиргем. Жаз мезгилинен бери мени коркутуп жашаган жеримди таап, эшикти бузуп үйдүн ичинен, көчөдөн кармап уруп келет», — деп жазылат маалыматта. Ушундай эле адаты менен 5-октябрь күнү барып, ар бир батирдин эшигин такылдатып, ызы-чуу салган.
«Манас шаарынын маал базарына алып барып зордуктоого аракет кылып, мени уруп, унаадан түшкөндө «өлтүрөм» деп сүзүп сала жаздаганда, жанындагы адамдар аны кармап, мени ооруканага алып келишти. Бир нече жолу милицияга кайрылгам. Азыркыга чейин «мен сени өлтүрөм» деп коркутуп келет», — деп жазды кыз.
Жалал-Абад облустук милициясы маалымат берип, бул окуя Сузак РИИБдин маалыматтарды электрондук каттоо журналына катталып, тергөөгө чейинки териштирүү иштери башталганын билдирди.
