25-июнда Жалал-Абад облусунун ички иштер башкармалыгынын жана УКМКнын Чек ара кызматынын кызматкерлери менен биргеликте жүргүзүлгөн ыкчам-издөө иш-чараларынын натыйжасында Бангладеш Республикасынын 11 жараны Өзбекстан менен Кыргыз Республикасынын мамлекеттик чек арасын өткөрүү пунктунан тышкары мыйзамсыз кесип өткөн учурда кармалды.
8-июнда Бангладеш жарандары Өзбекстанга эмгек миграциясы максатында келишкен, бирок жумуш таппай, белгиленген мамлекеттик чек ара бекеттерин айланып өтүү менен Кыргыз Республикасынын аймагына өтүүнү чечкен. Бангладеш жарандары менен биргеликте мыйзамсыз миграциялык канал уюштурган Кыргыз Республикасынын жараны Н.А.И. да кармалды. Учурда мыйзамсыз миграциялык каналды уюштурууга тиешеси бар башка адамдарды аныктоо боюнча ыкчам-иликтөө иш-чаралары жүргүзүлүүдө.
Мындан тышкары, 21-майда Жалал-Абад облусунун Базар-Коргон шаарында жана Сейдикум айылында УКМК кызматкерлери тарабынан ИИМдин Экстремизмге жана мыйзамсыз миграцияга каршы күрөшүү кызматы менен биргеликте Жалал-Абад облусунун аймагында мыйзамсыз жүргөн чет өлкөлүк жарандар аныкталып, жыйынтыгында Бангладештин 46 жараны кармалган, алар миграциялык мыйзамдын талаптарын эске албай, өлкө аймагында мыйзамсыз эмгектенишкен. Кармалган чет элдиктерге карата административдик протоколдор түзүлүп, сот органдары аларды Кыргыз Республикасынын аймагынан чыгаруу маселесин кароодо.
