Жогорку Кеңештин жыйынында УКМКнын төрагасы Камчыбек Ташиев депутат Эльвира Сурабалдиевага жооп берди. Ага чейин депутат Кемпир-Абад боюнча каршы добуш берген депутаттарды коркутуп жатышканын айткан болчу.
«Мен унаада келе жатып депутат Эльвира Жыргалбековнанын «УКМКнын кызматкерлери коркутуп-үркүтүп, салык боюнча маселелерди көтөрүп жатат» дегенин угуп калдым. Түшүндүрмө берип коёюн. Сурабалдиеванын өзүнүн, бир туугандарынын карамагында «Кудайберген» деген базар бар. Ал базарда 3 миңден ашык контейнер бар. Ошол контейнерлерден булар ар бир адамдан 2-3 миңден жыйнадык деп отчет беришет. А бирок 7 миңден 15 миңге чейин жыйнашат. Ошол жердеги салыкты эсептеп чыкканда, «Кудайбергенден» 70 миллион сомдун тегерегинде салык төлөбөй коёт. Бул боюнча акт түзүлгөн. Муну төлөөгө милдеттүү. Депутатмын, трибунам бар деп туруп эле туура эмес маалымат таратканды токтотушубуз керек. УКМК эч качан мыйзамсыз иштерди кылбайбыз. Кылууга да акыбыз жок.
Андан сырткары, 1-2 депутаттарга иштер бар. Муну алдын ала айтып коёюн. Кээ бириники өтө оор иштер. Жакында Башкы прокуратура кылмыш иши козгосо, аны да айтып чыкпагыла. Керектүү адамдар арыздарын берди. Эльвира Жыргалбековна, ошондуктан сиздин мага доомат коюуга негиз жок. Мен сизди көргөн да, сүйлөшкөн да эмесмин. Сизди депутат катары сыйлайбыз. Биз сиздин бир да адамыңызды алып барып камаган жокпуз. Жок жерден айта берген туура эмес», — деди Ташиев.
Ошол эле учурда депутат Салык кызматынын башчысына кайрылып, «Кудайберген» базарында 2,5 ай текшерүү жүргөнүн айтты. «Текшерүү жүргөнүнө канча болду? 1 ай өттү туурабы? 1 айда сизди адашты деп УКМК сурадыбы? Эч ким тартылган жок. Сиз адаштыңызбы же Камчыбек Ташиевдин бир тууган иниси «Эльвира, сен Кемпир-Абадга каршы добуш бердиң, өзүңөн көр» дегенди кандай түшүнөйүн? Кечээ, Кудайдын куттуу күнүндө иш бөлмөсүнө чакырып, гүл берип, торт берип куттуктап, берген жооптору. Бир тууган иниси. Бул эмне дегендигин сурасам, «сиз каршы бербедиңизби» деди.
Төрага, бизде канча президент бар? Бирөө туурабы? Мен экөө бар деп ойлоп жатам. Каалагандай калчап, коркутуп, күнүңөр аял кишиге түшүп калгандай болсо, сиздин да аялыңыз, сиздин да кыздарыңыз бар. 17 жыл мурда апамды Бакиевдер чырылдатып, жалдыратып коюшкан. Ошондо 40 күн келип, куураткан. Ошол кайталанып жатат. Бул жактагы депутаттар сүйлөй да албай калышты. Сизге жакпагандын баарын кууп, атып эле салбайсыздарбы? Сиз менен эч ким айтышпай да калды. Мен сиз тууралуу такыр башка ойдо болчумун», — деди депутат Ташиевге.
Спикер өз ара маселени парламентте чечишпөөгө чакырды. «Ар кимиң чыгып, өз маселеңди айта бересиңерби?» — деди спикер.
Ташиев 1 мүнөт сурап, депутатка жооп берди. «Дагы бир жолу айтайын, сиз менен байланышым жок. Мамлекетте канча президент бар экенин билбесеңиз уят эмеспи. Майдаланып мен эч нерсе кылган жерим жок. Жок нерселерге менин атымды чаптай бербеңиз. Сот чечим чыгарды. Менин эмне тиешем бар? Мен эмне кылышым керек? Атаңызды атып кетишкенде мен депутат болчумун. Мен 15 мүнөттөн кийин жетип баргам. А сиз алар менен кайра достошуп жүрөсүз», — деди ал.
