Жогорку Кеңештин төрагасы менен депутаттары сот алдында жооп бериши керек. Бул туурасында саясатчы Жеңиш Молдокматов Сереп Медиа агенттигине билдирди.
Анын айтымында, ал буга чейин президент Садыр Жапаровду сотко берүүгө камданып жаткан. Эми ага кошуп, Жогорку Кеңештин төрагасынын жана депутаттарынын үстүнөн да арызданат.
«Баш мыйзам боюнча референдум дайындоодо кандай мыйзам бузуулар болгонун жалпы эл көрүп турду. Оор берене менен кармалган Дүйшөн Төрөкуловду түнү менен абактан чыгарышты. Депутаттардын колун толгоп, үйлөрүнөн алып келип добуш бердиртишти. Ошого биз Жапаровго кошуп, төрага Талант Мамытовду, Жогорку Кеңештин бардык депутаттарын сотко берели деп жатабыз. Президентке койгон негизги дообуз -бийликти узурпациялоо. Ал эми төраганы шалаакылыкка, кызмат абалынан кыянаттык менен пайдаланууга айыптаса болот. Ал регламентти бузду, укугу жок туруп Конституциялык кеңешме түздү, а жалпы депутаттар буга көз жумду. Азыр юридикалык жактан баарын тактап атабыз. Дүйшөмбү күнү арыз менен Башкы прокуратурага, Жогорку Сотко кайрылабыз»,- деди Молдокматов.
Саясатчы эгерде жергиликтүү соттордон реакция болбосо, эл аралык деңгээлге чыгууга пландар бар экенин билдирди.
