Джиенбеков Бакыт Муратович Министрлер кабинетинин төрагасы Адылбек Касымалиевдин кечээ, 5-февралдагы буйругу менен Салык кызматынын төрагасынын орун басары болуп дайындалды. Бул тууралуу аталган кызматтан маалымдашты.
Бүгүн, 6-февралда Салык кызматынын төрагасы Алмамбет Шыкмаматов төраганын жаңы орун басарын жамаатка тааныштырды. Ал жаңы орун басардын салык системасы боюнча терең түшүнүгү бар экенин баса белгилеп, анын билими жана башкаруучулук көндүмдөрү салык чөйрөсүндө белгиленген реформаларды ийгиликтүү ишке ашырууга жардам берерине ишенимин билдирди. Алмамбет Шыкмаматов Бекболот Алиевдин жогорку кесипкөйлүгүн жана салык системасына кошкон зор салымын белгиледи. Салык кызматынын башчысы Бекболот Алиев мындан ары да өзүнүн тажрыйбасын жана билимин өлкөнүн салык тармагын өнүктүрүүдө колдоно берет деген ишенимин билдирди.
Бакыт Джиенбеков салык тармагындагы эмгек жолун 2002-жылы баштаган. Жаңы орун басар Бекболот Абдыганыевич Алиевдин ордуна дайындалды, ал буга чейин ээлеген кызматынан бошотулду.
