Жогорку Кеңештин төрагасы Нурланбек Шакиев Жалал-Абад облусундагы иш сапарынын алкагында Таш-Көмүр шаардык жалпы дарыгерлер практикалык борборунун ишмердүүлүгү менен таанышты. Бул тууралуу парламенттен маалымдашты.
Аталган борбордун имараты 1958-жылы пайдаланууга берилип, азыр анда 6 бөлүм жайгашкан. 30 дарыгер, 114 орто медициналык кызматкерден турган жамааттын башкы талабы имаратты жаңыртуу жана заманбап медициналык жабдуулар менен камсыздоо. Ошондой эле борбордо дарыгерлердин жетишсиздиги да негизги маселе. Оорукананын кызматкерлери менен баарлашкан төрага түзүлгөн шарттын начардыгына карабай жасап жаткан иштери үчүн ыраазычылык билдирди.
“Таш-Көмүр шаары Бишкек-Ош унаа жолунун боюнда жайгашкандыктан, жергиликтүү тургундардан тышкары, жолоочулар да ушул ооруканага кайрылышары белгилүү. Андыктан, шаар үчүн эле эмес, жалпы өлкө үчүн мааниси чоң бул медициналык жайды толук оңдоп-түзөөдөн өткөрүү маселесин атайын планга киргизебиз”, – деди Нурланбек Шакиев.
Муну менен катар борборго Жогорку Кеңештин төрагасы эки медициналык муздаткычты тапшырды.
