Бүгүн, 19-декабрда президент Садыр Жапаров Улуттук коопсуздук мамлекеттик комитетинин Чүй облусу боюнча башкармалыгынын жаңы административдик имаратынын ачылышына катышты. Бул тууралуу президенттин маалымат катчысы Аскат Алагозов билдирди.
“Кыргыз мамлекетинин улуттук коопсуздук органдарынын калыптануу тарыхы тээ 1918-жылдан башталса, Мамлекеттик коопсуздук комитетинин Чүй облусу боюнча башкармалыгы 1991-жылы түзүлгөн экен. Ушул мезгилден баштап УКМКнын Чүй облусу боюнча башкармалыгы Чүй облусундагы контрчалгындоо иштерин камсыздоону үзгүлтүксүз аткарып келет.
Айтайын дегеним, жогоруда белгиленген мезгилдерде Чүй облусу боюнча башкармалыктын өзүнүн туруктуу имараты жок болгондугуна байланыштуу, ар кайсы обьектилерде жайгашууга мажбур болгон экен. Маселен, 2007-жылга чейин Токмок шаарында иш алып барса, 2007-2010-жылдар аралыгында УКМКнын аскердик бөлүгүнүн аймагында иштеген. 2010-жылдан тартып 2012-жылга чейин Чек ара кызматынын имаратында жайгашкан. 2012-2017-жылдары болсо УКМКнын Антитеррордук борборунун мекемесинде иштеп келишкен. Борборубуз Бишкек шаары жайгашкан кең Сары-Өзөн Чүй облусу боюнча башкармалыктын өзүнүн имараты жок иш алып барышы эле көп нерседен кабар берип турат. Мамлекет кай жакты карап келген деген суроо туулат.
Албетте, башкармалыктын негизги функциясы — конституциялык түзүлүштү коргоо, терроризмге каршы аракеттенүү, контрчалгын, маалымат-аналитикалык талдоо иштери үзгүлтүккө учураган эмес. Ошентсе да административдик имараттын жоктугу кайсы бир деңгээлде толук кандуу иш жүргүзүүгө өз кедергисин тийгизип келген.
Мына ушундан улам, 2022-жылы демилге көтөрүп, Улуттук коопсуздук мамлекеттик комитетинин Чүй облусу боюнча башкармалыгы бүгүнкү күндүн талаптарына жооп бере турган жаңы имаратын курууну тапшырган элем. Ошол тапшырмамдын негизинде УКМКнын төрагасы Камчыбек Ташиев жаңы имарат салууну өз колуна алган. Натыйжада, УКМКнын Чүй облусу боюнча башкармалыгы, өзүңүздөр күбө болуп тургандай, жаркыраган имараттуу болуп олтурушат.
Расмий маалыматтарга ылайык, көп этностуу Чүй облусунда 1 069 000 адам жашайт. Бирок облустагы ички жана тышкы миграциянын абдан чоң деңгээлине байланыштуу, иш жүзүндө 1,5 миллионго жакын эл бар. Бул өлкө калкынын жалпы санынын 21 пайызын түзөт. Демек, облустук башкармалык катары сиздердин иш көлөмүңүздөр бир топ чоң. Ошого жараша ыңгайлуу имараттын болушу дагы максатка ылайыктуу.
Мына эми ошол боштук, кенемте бүгүн толуп олтурат десем болот. Бул заманбап имараттардын ачылышы менен Улуттук коопсуздук орган кызматкерлеринин ишинин натыйжалуулугу жана ыкчамдыгы артып, ички-тышкы коркунучтарга каршы күрөшүүнүн сапаты жогорулайт деп үмүт артам!» — деди президент.
Жалпы аянты 5000 чарчы метрди түзгөн жаңы имаратка керектүү материалдык-техникалык жабдуулар алынып, кызматкерлердин толук кандуу иш алпарышына бардык ыңгайлуу шарттар түзүлгөн.
