«Дүйнөлүк чемпионатта Аргентинаны жеңген жалгыз команда Сауд Арабия болду. Мен бул жакка жеңиштен ырахат алууга келдим». Бул тууралуу Криштиану Роналду билдирди.
Криштиану Роналду Сауд Арабияга келип, «Аль-Наср» командасынын оюнчусу катары алгачкы маалымат жыйын берди. Аны «Мрсул-парк» стадионунда күйөрмандары тосуп алышты.
«Мен жашоомдо бул маанилүү чечимди кабыл алганыма сыймыктанам. Акыркы 10-15 жылда футбол өзгөрдү, азыр ар бир эле команданы жеңүү оор. Дүйнөлүк чемпионатты мисалга алсак, Аргентинаны жеңген жалгыз команда Сауд Арабия болду. Мен бул жакка жеңиштен ырахат алууга келдим», — деди ал.
Айрым маалыматтарга караганда, Криштиану Роналду жылына 90 миллион евро (бонустар менен 200 миллион еврого чейин жетиши мүмкүн) айлыктан тышкары келишимде анын хансарайда жашоосу, ага жана анын үй-бүлөсүнүн муктаждыгына ашыгы менен көңүл бурулуусу, Испания менен Португалияга бекер барып келип туруусу да каралган.
