Ырчы Кайрат Примбердиев мурдагы жубайы Эля Бегалиева боюнча пост жазды.
«Ооба. «Голос» долбоорунда Эля мен үчүн жан үрөп колдогону чындык. Талашсыз. Ал үчүн бу кишиге ыраазымын. Бирок туугандар келгиле кичине акыл калчап, ой жүгүртөлү. Биринчиден, талант Кудайдан берилет. Экинчиден, мен көчөдө бомж болуп жаткан жеримен таап алып, курсагымды тойгузуп, кийинтип адам кылган деле эмес.
Эля менен таанышкан кезде мен Кудайдын буйругу менен продюсер Динара Эсенгулова эжемдин, Султан Садыралиев классташымдын, Кыргыз элинин колдоосу менен “Сагынганда”, “Апам үчүн” деген автордук ырларым менен таанымал ырчы болчумун.
Мени Кудай ушундай үн менен, ырдай ала турган кылып жаратканы үчүн миң мертебе шүгүр келтирем. Менин бул жашоого келишиме себепкер болгон эң биринчиден ата-энем бар. Ал кишилердин салымы жок бекен? Баарын эле Эля кылып койгонсуп, укмуш келтирет экенсиздер да.
Кеп жок. Элянын мага кылган жакшылыгына мен чын жүрөктөн ыраазымын. Бирок кичине калыс болсоңор туугандар, макулбу? Кудайды унутпайлы. Биздин жашообуздагы болуп жаткан нерселердин баары Кудайдын буйругу менен болот. Эля менин жашоомдо Кудайдын буйругун аткарган киши.
Ал эми биздин үй-бүлөлүк мамиледе 11 жыл ичинде эмнелер болгонун сиздер билбей эле койгонуңуздар оң. Медалдын эки тарабы бар деген сөз бар. Мага кылган жакшылыгы үчүн Эля алчунун баарын алган. Ээн талаада, балдар менен ичерге тамагы жок, үстүндө үйү жок таштап кеткен эмесмин. Мен эркекмин да. Унчукпай эле коёюн десем айттырасыздар.
Урматтуу элим. Эгер бир нерсеге оюбуз, сөзүбүз менен кийлигишкибиз келип жатса, анда жок дегенде ой жүгүртүп, калыс ой айтканды үйрөнөлү», — деп жазды ал.
