Ырчы Мирбек Иманбеков мындан 20 жыл мурда чоң сахнага аттанып, “Жаным”, “Сүйүүнүн керемети”, “Таластык кыз”, “Кара көз” жана башка бир топ ырларды аткарып, музыка сүйүүчүлөрүнүн жүрөгүнөн түнөк тапкан. Ал ырдаган чыгармаларды күйөрмандар күнү бүгүнкүгө чейин унутпай, ооздон түшүрбөй ырдап келишет. Арадан 20 жыл өтүп, Иманбеков кайрадан концерт берүүнүн алдында турат. Күнү-түнү даярданып жаткан аны менен концерт, артта калган 20 жыл, анын чыгармачылыгын колдогон адамдар тууралуу сүйлөштүк.
«Көп учурда келинчегиме таянам. Жубайым ысык-суукка чыдап, балдарды карап, тарбия берип келе жатат. Ата-энеме ысык чайын берип келе жаткан жубайыма чыгарылган ырым да аздык кылат. Ден соолук, аялзаттык бакыт каалайм. Мен да дайыма колдоп, бактылуу кылууга аракет кылам», — деди ал.
«Ырчылыкты абдан жакшы көрөм. Менин кыялым. Өзүмдү ыры жок элестете албайм. Ооруган учурда алыстай түштүм. Ооруганда эч нерсенин кереги жок болуп калат экен. Жашоодо дайыма ырды ойлоном. Кудай канча өмүр берсе, ошончо ырдап өтөм. Жашоомдогу бардык нерсеге ыраазымын. Жаштыкка салып, ден соолугумду карабай койгонума өкүнөм. Бул нерсеге өзүм күнөөлүүмүн», — деди ал.
