Бишкектеги Абдылас Малдыбаев атындагы опера жана балет театрында 6-март күнү «Ак куу көлү» спектаклин коюу алдында чыр чыкты. Орусиядан артисттерди чакырып, спектаклди уюштурган «Радужка» фонду муну атайын жасалган чагым деп баалап, көрөрмандардан кечирим сурады.
Петр Чайковскийдин «Ак куу көлү» чыгармасын көрсөтүү үчүн аталган фонд орус балетинин көрүнүктүү артисттери Екатерина Первушина менен Сергей Мануйловду чакырышкан. Бирок спектакль белгиленген убакыттан 40 мүнөт өтсө да башталган эмес. Андан соң жергиликтүү артисттер сахнага чыгып, орусиялык артисттер менен иштешпей турганын билдиришкен. Соцтармактарда бул гонорарга байланыштуу болушу мүмкүн делген пикирлер айтылды.
Фонддун төрайымы Сагида Жумабекова муну атайын уюштулуган чагым катары эсептейт.
«Биз юридикалык жакпыз, ар бир артист менен келишим түзүүгө укугубуз жок. Бул мүмкүн да эмес. Биз театр менен келишим түзүп, өз милдеттерибизди ак ниет менен аткардык, ижара акысы үчүн жогорулатылган бааны төлөдүк. Жергиликтүү артисттер оюн болордун алдында «70 миң сом төлөгүлө» деп талап кылышты. Биз макул болуп, акчаны алып келдик, бирок ошондо да артисттер чыкпай коюшту. Алар спектаклге даяр эмес экен. Бул мурдатан пландалган акция», — деп билдирди Сагида Жумабекова.
Анын айтымында, келишим боюнча фонд ижараны театрдын кассасына төлөйт, андан ары ал акчанын тагдырын театр чечет.
«Биз эч нерсе деп кийлигише албайбыз. Кийин көшөгө артында артисттер биздин фондго эмес, айлык акынын аздыгы үчүн жетекчиликке нааразы экенин айтышты. Анда алар эмне үчүн дал ушул орусиялык артисттер катыша турган спектаклдин алдында мындай жорукка барышты? Буга чейин башка деле спектаклдер деле коюлуп келаткан да, эмнеге бул көйгөйдү ошол кезде көтөрүшкөн жок?» — деп таң калат ал.
Мындай ызы-чууга карабастан, спектакль коюлган. Сахнага чыкпай койгон артисттердин ордуна башкалар чыгышкан. Учурда фонд акт түзүп, Опера жана балет театрына өз доосун коймокчу.
Орус артисттеринин катышуусундагы «Ак куу көлү» спектакли бир эле күнгө пландалган. Билеттин баасы 1000 сомдон 2000 сомго чейин сатылган. Спектаклдин башында жарнамасында Орусиядан артисттер Мария Бек менен Сергей Мануйлов келери айтылган. Кийин Бектин ордуна Екатерина Первушина келген.
