Кыргыздын сыймыктуу спортчу кызы, дүйнөнүн үч жолку чемпиону Айсулуу Тыныбекова Ат-Башы районундагы жаш спортчулары, күйөрмандары менен жолугушту.
Чемпионду район акими баштаган айыл аймактардан атайын келген жаш күйөрмандары салтанат менен тосуп алышты. Район башчысы Эмилбек Абдыкадыров спортчунун жеңиши менен куттуктап, ар бир жеңиши үчүн бүтүндөй кыргыз эли кубанып, сыймыктанып, суктанып келээрин, ошондой эле Айсулуунун ар бир кадамы, жеңиши келечек муунга үлгү болоорун баса белгилеп, райондо анын жолун жолдогон мыкты спортчулар көп чыгуусун каалады. Кыргызстандын атын дүйнөгө таанытып, желегин желбиреткен спортчуга Ат-Башы районунун “Ардактуу атуулу” наамы ыйгарылып, кол өнөрчүлөрдүн кол эмгегинен жасалган белек тапшырылды.
Иш-чаранын жүрүшүндө окуучулар Айсулуу Тыныбекованын спортко келүүсү, жеңиштери, алдыдагы мелдешке даярдыктары, бала чагы, билими боюнча кызыктырган суроолоруна жооп алышса, айрымдары атайын кеңеш сурап өтүштү. Тыныбекова берилген бардык суроолорго жооп берип, кызыктуу, маанилүү суроолордун ээлерине чакан белектерин берсе, атайын колдоп келген күйөрмандарына кол тамгасы коюлган буклеттерин таратты.
