Суу ресурстары, айыл чарба жана кайра иштетүү өнөр жайы министрлигинде жалпы дал келбестиктердин суммасы 2 миллиард 304 миллион сомдон ашты. Бул тууралуу Эсеп палатасынан билдиришти.
2023-жылы министрликке бөлүнгөн бюджеттин жалпы көлөмү 10 миллиард 628 миллион сомду түзүп, анын 94,6 пайызы аткарылган. Бирок аудит учурунда ири көлөмдөгү каражаттар максатсыз пайдаланылып, бир катар мыйзам бузууларга жол берилгени аныкталды.
Максатсыз пайдаланылган каражаттар – 987,7 миллион сом.
Каражаттарды бөлүштүрүүдө жана чыгымдоодо олуттуу кемчиликтер орун алып, анын ичинен 880,5 миллион сом өз максатына ылайык колдонулган эмес. Ошондой эле 106 миллион сом бюджеттик каражаттар мыйзам талаптарына каршы сарпталган.
Эмгек акылар жана социалдык төлөмдөр боюнча бузуулар – 194,3 миллион сом.
Кызматкерлерге мыйзамсыз төлөнгөн маяна, сый акы жана кошумча төлөмдөрдүн суммасы 194,3 миллион сомго жеткен. Аудит учурунда анын бир бөлүгү – 1,2 миллион сому калыбына келтирилди.
Бюджетке төлөнбөгөн милдеттүү төлөмдөр – 6,4 миллион сом.
Министрлик тарабынан салык жана башка милдеттүү төлөмдөр өз убагында жана толук көлөмдө которулган эмес.
Кассалык операциялар боюнча бузуулар – 50,1 миллион сом.
Каражаттардын негизсиз которулушу, аванстык төлөмдөрдүн ашыкча жүргүзүлүшү жана бюджетке түшпөй калган суммалар ири өлчөмгө жеткен. Мисалы, Балык өнөр жай комплекси департаментинде республикалык бюджетке түшүүгө тийиш болгон 2,8 миллион сом негизсиз түрдө атайын эсепке которулган.
Мамлекеттик сатып алуулардагы мыйзам бузуулар – 6,9 миллион сом.
Тендер өткөрбөстөн жана конкурстук шарттарды сактабастан, ири суммадагы сатып алуулар жүргүзүлгөн.
Курулуш жана оңдоо иштериндеги мыйзам бузуулар – 3,8 миллион сом.
Курулуш иштеринде аткарылган иштердин көлөмү негизсиз жогорулатылып көрсөтүлүп, бюджетке миллиондогон сомдордун чыгым болушуна алып келген.
Мамлекеттик инвестицияларды пайдалануудагы кемчиликтер – 915,8 миллион сом.
Дүйнөлүк банк тарабынан каржыланган «Айыл чарба өндүрүмдүүлүгүн жана тамактанууну жакшыртуу» долбоорунда сатып алынган техникалар жана жабдуулар убагында каттоого алынган эмес. Ошондой эле, айрым эл аралык долбоорлор боюнча максатсыз чыгымдар жана ишке ашпай калган пландар үчүн миллиондогон сомдор коротулган.
Мамлекеттик ишканалардагы мыйзам бузуулар – 11,7 миллион сом.
«Талас балык чарбасы» мамлекеттик ишканасы өз уставына каршы келип, көлмөлөрдү мыйзамсыз түрдө сатып жиберген. Ал эми «Өзгөн балык чарбасында» балык өстүрүү үчүн бөлүнгөн жер тилкелеринин 63,8% күрүч өстүрүүгө пайдаланылган.
Аудиттин жыйынтыгы боюнча министрликтин бюджетин пайдаланууда олуттуу мыйзам бузуулар жана каржылык тартипсиздиктер аныкталды. Бул финансылык мыйзам бузуулар министрликтин ишмердүүлүгүндө олуттуу реформалар зарыл экенин айгинелеп турат. Бул кемчиликтерди жоюу жана бюджеттик тартипти күчөтүү максатында аудиттин жыйынтыктары тиешелүү мамлекеттик органдарга жеткирилип берилмекчи.
