«АКШда кыргызстандык жубайлар баласы менен киши колдуу болду» деген маалыматты ТИМ тастыктады.
Бардык жагдайларды тактоо үчүн Кыргыз Республикасынын Чикаго шаарындагы Башкы консулдугу АКШнын укук коргоо органдарына ыкчам түрдө кайрылды. АКШнын укук коргоо органдарынын маалыматына ылайык, Кыргыз жарандары: 1980-жылы туулган М.А., анын 1977-жылы туулган жубайы А.Б. жана алардын 2019-жылы туулган уулу М.А.нын жансыз денелери табылган.
«Учурда тиешелүү тергөө иштери жүрүп жатат жана тергөөнүн купуялуулук принциби үчүн окуянын чоо-жайы айтыла элек», — деп айтылат маалыматта.
Кыргыз Республикасынын Чикаго шаарындагы Башкы консулдугу маалымат түшкөн учурдан тартып укук коргоо органдары жана каза болгондордун туугандары менен туруктуу байланышта. Ошол эле учурда сөөктөрдү мекенине жеткирүүгө байланыштуу бардык маселелер иштелип чыгууда. Бул иш Тышкы иштер министрлигинин жана Кыргыз Республикасынын Чикаго шаарындагы Башкы консулдугунун өзгөчө көзөмөлүндө.
