“Манас” эл аралык аэропортунун учуп-конуу тилкесин оңдоо иштери кызуу жүрүүдө. Бул тууралуу президенттин маалымат катчысы Аскат Алагозов билдирди.
Анын айтымында, оңдоп-түзөө иштери быйыл октябрь-ноябрда соңуна чыгат. Муну менен биринчиден учуп-конуу тилкеси жаңыртылып, ага учактардын жумшак конуусуна шарт түзүлөт.
«Экинчиден, ремонт иштеринин жүрүшүндө учактардын конуусуна белги бере турган эң заманбап жарыктандыргычтар орнотулат. Бул өз кезегинде учурда аба ырайынын начарлоосунан учактар коно албай калган учурларды дээрлик жокко чыгарат.
Мисалы, азыркыдай бир аз туман түшсө, башка аэрпортко кетирүү маселеси жаралбайт. Кыскасын айтканда, аэропортубуздун учуп-конуу тилкеси эң жогорку талаптагы технологиялык жабдыктар менен жабдылып, замандын талабына шайкеш келет.
Ушундай эле жумуштар кийинки жылы “Ош” эл аралык аэропортунда жасалмакчы. Баса белгилей кетчү жагдай бул курулуш иштерин каржылоо “Кыргызстан аэропорттору” ААК өздөрү тапкан каражаттарынын эсебинен жүрүүдө»,- деп айтылат маалыматта.
