Бүгүн, 31-мартта Жогорку Кеңештин бюджет, экономикалык жана фискалдык саясат боюнча комитетинин жыйынында Салык кызматынын төрагасы Алмамбет Шыкмаматов Салык кодексине кандай өзгөртүүлөрдү киргизүү пландалып жаткандыгын айтып берди.
Ал бир нече мыйзам долбоор даярдалып жатканын билдирди.
“Чакан жана орто бизнеске патент кайра кирет. Бул чакан жана орто бизнесте жүргөн жеке ишкерлер менен сүйлөшүүлөрдөн кийин сунуштарын эске алдык. Мурунку процедураны туура эмес деп айтпайбыз. Ал “тартип болсун, баары салык төлөсүн” деген жакшы идея болгон, бирок биздин базарлар, инфраструктура, контролдоо системасы ага даяр эмес экенбиз. Азыр патент системасын кайтарабыз. Мурда балмуздак сатканы деле, контейнер иштеткени деле бирдей төлөгөн. Бул адилетсиз да. “Жок, менин кирешем патент төлөгөнгө жете элек” десе, ал ККМ менен иштей берет. Биз эркиндик бердик. Кааласа патент төлөсүн, кааласа ККМ колдонсун”,- деди.
