«Тарыхыбыздагы эң чоң жетишкендик — Кыргызстандын ооруканаларында бөйрөк, боор жана сөөк чучугун алмаштыруу иштери башталганы. Мен ойлойм, жакын арада жүрөк алмаштырууга да жетебиз». Мындай билдирүүнү саламаттыкты сактоо министри Алымкадыр Бейшеналиев жасады.
Ал ушул жылдын жыйынтыгын чыгарып жатып, Кыргызстан өз эсебинен 25 оорукана курганын кошумчалады.
«Биздин бюджет 2020-жылы 22 миллиард сом болсо, ушул жылы 43 миллиардга жетти. Келээрки жылы 46 миллиард бөлүнөт. Бул каражатка биздин ооруканалардын техникалык базасы жаңыртылат», — деди Бейшеналиев.
Анын айтымында, «Кыргызфармация» түзүлгөндөн кийин дары-дармектер арзандаган. Азыркы күндө 290 ооруканаларга «Кыргызфармация» дары-дармектерди арзан баада жеткирип берет. Мурда тендер аркылуу алынчу дары-дармектер салыштырмалуу 400-500 эсе арзан болуп жатканын белгиледи министр.
Андан сырткары “Эл-Аман” дарыканалары иштеп жатканын айткан Бейшеналиев алардын саны 100гө жеткенин жана 2500дөн ашык дарынын түрү бар экендигин кошумчалады. «Дарылар менчик дарыканага караганда 20-30 пайыз арзан сатылат», — дейт министр.
Өтүп бараткан жылы медициналык кызматтар санариптештирилип, эмгек акы жогорулаганын айтты.
