Кечээ, 7-апрелде Талас облусунун Аманбаев айыл аймагында Дастан Анарбеков атындагы балдар бакчасы пайдаланууга берилди. Иш-чарага УКМК төрагасы Камчыбек Ташиев, Чек ара кызматынын 2029 аскер бөлүгүнүн өздүк курамы, жергиликтүү бийлик өкүлдөрү, ошондой эле бала бакчанын тарбиялануучуларынын ата-энелери катышкан.
Бала бакчага Баткен районунун «Достук» чек ара заставасынын аскер кызматкери, 2022-жылы чек арадагы куралдуу кагылышууда баатырдык менен курман болгон лейтенант Дастан Анарбековдун ысымы ыйгарылды. Камчыбек Ташиев маркумдун ата-энесине кайрылып, Дастан Анарбековду эскерди.
«Мен дагы бир жолу Дастандын ата-энесинин алдында башымды ийип, таазим этем. Себеби, Дастан балабызды төрөп, өстүрүп, тарбиялап, чоңойтуп, элдин камын көрө турган жигит кылдыңыздар. Бул өмүрдө Дастан уулубуз өзүнө тагылган милдетти ак, таза аткарып кетти. Балабыз чынында баарыбызга үлгү болду. Достук айылын коргоодо өзүнүн кол алдындагы аскерлерин чыгарып жиберип, акырына чейин мектептин имаратында калды. Аягына чейин атышып, ошол жерде каза болду»,- деди ал.
- 2022-жылдын 6-октябрында УКМКнын Чек ара кызматы маалымат таратып, Чек ара кызматынын бронежилет кийген аскер кызматкеринин денесинин калдыктары табылганын билдиришкен. СЕРЕП МЕДИА маалымат агенттиги Дастан Анарбековдун апасы менен байланышканыбызда, ДНК-анализдин жыйынтыгы чыга элегин билдирген. Кийинчерээк апасы маек берип, ДНК-анализ чыкканын, жансыз дене уулуна таандык экенин чыгарып бергенин, бирок ал ишенбей турганын айтып берген эле.
