Нарын облусунун Ат-Башы районунда тоют жыйноо иштери кызуу жүрүп жатат. Быйылкы жылы аталган райондо жаан-чачындын арбын болушу жана агротехникалык талаптардын так сакталуусу менен чөптүн түшүмдүүлүгү жогору болду.
Район боюнча жалпысынан 27 миң гектар аянтта чөп чабылып, негизинен эспарцет, сулу жана башка тоют өсүмдүктөрү жыйналууда. Бүгүнкү күнгө карата анын ичинен 6000 гектардан ашуун жердеги чөп толугу менен чабылып, дыйкандар тоюттарын кышка камдап бүтүрүү алдында турушат. Түшүмдүүлүктүн жогору болгонуна байланыштуу быйыл чөптүн баасы өткөн жылга салыштырмалуу кыйла төмөндөдү. Эгерде былтыр бир түк чөп 220-280 сомдон сатылса, учурда анын баасы 150-200 сомго барабар. Бул болсо мал чарбачылыгы менен алектенгендер үчүн бир топ жеңилдик болуп, тоют менен камсызданууга ыңгайлуу шарт түзүүдө. Мындан тышкары, район аймагындагы айрым айыл өкмөттөрдө тоютка болгон муктаждыкты жабуу максатында чөп алыскы жайлоолордон да ташылып келүүдө. Жергиликтүү тургундардын айтымында, алдыдагы жумада тоют даярдоо иштери толук аяктап, чарбалар кышкыга толук камылга көргөн абалга жетет.
