Бүгүн, 7-августта Кадамжай районунун Ак-Турпак айылындагы Бүргөндү массивинде болдук. Бул жерде Кыргызстандагы суу ресурстарын эффективдүү пайдалануу жана айыл чарбасын өнүктүрүү багытында кезектеги ири долбоор ишке ашырылууда, анын жалпы аянты 12 438 гектарды түзөт. Бул тууралуу соцтармактагы баракчасына Айыл чарба министри Бакыт Төрөбаев жазды.
Учурда массивдин 7200 гектары өздөштүрүлүп дыйкандарга берилген. Ал эми Дюкердин астындагы 3500 гектар жер толук өздөштүрүлүп, пайдаланылууда. Бүгүнкү күндө Бүргөндү магистралдык каналынын суу алуу сыйымдуулугу 18,8 м³/сек түзөт. Бирок аймактагы жер кыртышынын шагылдуу жана таштак болушуна байланыштуу сугат сууну нормадан көп талап кылат. Ошондуктан, калган жаңы жерлерди өздөштүрүү максатында каналдын башынан 100+00 пикетке чейин анын суу өткөрүү мүмкүнчүлүгүн 35 м³/сек. чейин жогорулатуу зарылчылыгы жаралууда. Долбоор ишке ашса, кошумча параллелдүү каналдын курулушу аркылуу: — Ак-Турпак айыл өкмөтүнүн 5250 гектар эгин талаалары сугат суу менен туруктуу камсыз болот; — жаңы ачылган Дюкер участогундагы 3500 гектар жерге да суу жетет; — Молдо-Нияз айыл өкмөтүнүн Кыргыз-Кыштак айылындагы 2100 гектар аянтта сугат суу жеткиликтүүлүгү жогорулайт; — мындан сырткары, кошумча 2000 гектар жаңы сугат жер өздөштүрүлөт.
Бул долбоорду ишке ашыруу максатында учурда «Кыргызсуудолбоор» ишканасы тарабынан долбоорлоо иштери жүргүзүлүп жатат. Жалпысынан 49 чакырым узундуктагы жаңы канал куруу каралууда.
