11-февралда Бишкектеги Жүрөк хирургиясы жана органдардын трансплантациялоо институтунда кечки саат 21:07 чамасында өрт кырсыгы катталган. SEREP TV телеканалы бейтаптардын жакындарынан окуя тууралуу сурады.
Баласынын ден соолугуна байланыштуу 2-январда ооруканага баласын алып жаткан Шааркан Акматова үн чыкканын укканын, бөлмөдөгү башка бейтап багуучулар менен сыртка чыгышканын айтып берди.
«Ошол түнү бөлмөдө 3 киши сүйлөшүп отурганбыз. Катуу үн чыкты, биз стол түшкөн го деп ойлоп койгонбуз. Анан жанымдагы аял сыртка чыкты. Медайымдар «батыраак чыккыла, алдыда бир нерсе жарылды, өрт башталды» деди. Мен күрмөмдү кийгенге жетиштим. Экинчи кабатта жыт жок болчу, биринчи кабат кара түтүн болуп, эч нерсе көрүнбөй калыптыр. Араң чыктык, анан эле жарык өчтү. Адамдар караңгыда чыга албай, эшикти да таппай жатышты. Үчүнчү кабатта улуулар жатчу, аларды алып түшүп жатышкан. Коляска, коталка менен кары-картаңдарды, оорулууларды алып келип жатышты. Эч нерсе көрүнбөйт, дем ала албайсың. Биз эшиктин оозуна келип, фонариктерибизди күйгүзүп жарык бердик. Бул жакка келгиле, жарыкка карай баскыла деп кыйкырып жаттык», — деди Шааркан Акматова.
Анын баласы 14-январда операция болгон, 27 күндөн бери реанимацияда жаткан.
«Баламдын абалы бирде жакшырат, бирде начарлайт. Ошол күн күндүз кислороддон чыгарышып, өз алдынча дем алдырууга аракет кылып жатышкан. Эшикке чыгып эле, балдарыбызды издеп калдык. Анткени биз үчөөбүздүн балдарыбыз оор абалда реанимацияда болчу. Издеп жүрүп, тез жардам унаасынын ичинен таптык. Терезелерди сындырып, алып чыгышкан экен. Балдарыбызды көрүп өзүбүзгө келдик. Анткени баламдын сөөгүн көрө аламбы же өрттө калып кеттиби деп коркуп жаткам», — деди көзүнө жаш алган эне.
