Кино жана театр актёру Руслан Курманалиев 53 жашында көз жумду. Маркумдун кесиптештери аны эскеришти. «Өлбөй турган жигит эле, ажал алып кете берди. Анын токко урунуп каза болгонун укканда ишене алган жокпуз» дейт чогуу иштешкендер.
«Түш көргөндөй болуп жатам. Руслан Курманалиев жөнүндө айта турган сөз көп, сөз бүтпөйт. Театрга кандай келсе, акыркы күндөргө чейин өзгөргөн жок. 4 жыл мурун президенттин колунан Ардак грамота алды. Ошондо куттуктасам дагы, «рахмат, ата» деп койду. Театралдык окууну бүтүп жатканда үйлөндү. Мени «өкүл ата коём» деди. Албетте, мен үчүн сыймык дедим. Азыр тамакка болгон табитим да жок жүрөм»,— деди Турусбек Жумалиев.
«Көлдө тартуу иштери менен жүргөм. Жолго чыкканыма 15 мүнөт өтпөй эле уулум чалып калды. «Руслан байке, өтүп кетти» деди. Мен түшүнбөй калдым. Эмне кыларымды билбейм. Көлдөн Бишкекке жетпей койдук. Азыркы күнгө чейин ишене албай жатабыз.
«Атам үйдө уктап жаткан. Бир маалда туруп эле «жарык өчүп калдыбы?» деди. Мени дүкөнгө жөнөттү. Алчумду алып, акча төлөп жатсам дүкөндөгү жарык күйүп калды. Үйгө келип, атамды издедим. Кирип 2-кабатка чыксам эле атам кулап калыптыр» деди уулу. Ал анын эле үйүндө жарык өчүп калыптыр деп ойлоптур. Анан бир нерсени бурай калайын дептир. Ток жүрөктү токтотуптур деп чыгарып беришиптир»,- деди актёр Жээнбек Моңошев.
