Бишкектиктер соңку күндөрү ысык суунун ордуна жылуу суу келип жатканына даттанууда. Мэрия маалымат берди.
«Бишкек шаарында жылытуу мезгили аяктагандан кийин айрым керектөөчүлөрдүн үйлөрүндө ысык суунун температурасы убактылуу төмөндөшү мүмкүн.
Биринчи себеп – ысык суунун жылуулук электр борборунан керектөөчүнүн кранына жеткенге чейинки түтүктөрдө табигый муздашы. Кышында жылытуу мезгилинде эки түтүктүү циркуляциялык режимде, ЖЭБден керектөөчүгө чейинки суу температурасынын төмөндөшү орточо 3-5 ℃ ашпайт. Бирок жаз жана жай мезгилинде, жылуулук түйүндөрү бир тараптуу (тупиковый) схема менен иштегенде жана суу агымы 3-4 эсеге азайганда, кыйла муздай баштайт. Түн ичинде, ысык суу дээрлик колдонулбаган учурда, анын температурасы дагы да төмөндөйт.
Экинчи себеп – турак жайларда электр суу ысыткычтарынын, душтардын массалык түрдө орнотулушу жана ошондой эле же иштебей калган аралаштыргычтар да себеп болот. Бул жабдууларды туура эмес колдонуу муздак суунун үйдүн ысык суу түтүктөрүнө өтүшүнө алып келип, тургундардын даттануусуна себеп болот. Бир эле туура эмес орнотулган суу ысыткыч бүтүндөй үйдүн ысык суу менен камсыздалышын бузушу мүмкүн. Мындай учурлар айрыкча, жылуулук түйүндөрү капиталдык оңдоодон кийин кайра ишке киргизилгенде көп кездешет, анткени көпчүлүк тургундар суу ысыткычтарын туура өчүрбөй коюшат», — деп айтылат маалыматта.
