2024-жылдын аягына карата “Бишкек суу канал” муниципалдык ишканасынын абоненттеринин карызы дээрлик 145 миллион сомго жетип, анын суммасы өсүүдө. Бул тууралуу мэриядан маалымдашты.
Суу менен камсыздоо жана канализация боюнча карыздар ишкананын иштешине тоскоолдуктарды жаратып, оңдоо иштерин кечеңдетүүдө, ишкананын кызматкерлерине эмгек акы төлөөдө, суу түтүк жана канализация тармактарын модернизациялоодо, насостук станцияларды жана тазалоочу курулмаларды жаңылоодо. Карыздардын топтолушу көрсөтүлүүчү кызматтардын сапатына терс таасирин тийгизип, шаардын суу инфраструктурасынын туруктуу иштешин кыйындатат. Мындан тышкары, жетишсиз каржылоо Бишкектин экологиялык абалынын начарлашына алып келиши мүмкүн.
Суу менен камсыздоо жана канализация кызматына акы төлөө шаардын суу түтүктөрүнүн туруктуу иштешинин негизи болуп саналат. Утурумдук төлөмдөр өз убагында оңдоого, суунун сапатын жакшыртууга жана үзгүлтүксүз суу менен камсыз кылууга мүмкүндүк берет. Буга байланыштуу “Бишкексууканал” муниципалдык ишканасы абоненттерди тез арада болгон карыздарын төлөөгө чакырат. Төлөнбөгөн учурда 4-февралда саат 10:00дө ишкана учурдагы ченемдерге ылайык карызкорлорго суу берүүнү чектөөгө аргасыз болот.
