Президент Садыр Жапаров кечээ, 10-июлда Бишкек шаарындагы Калый Молдобасанов көчөсүндө Мамлекеттик ипотекалык компания тарабынан курулган жаңы турак жай комплексиндеги батирлердин ачкычын тапшыруу аземине катышты.
Мамлекет башчысы салтанаттуу иш-чараны ачып жатып, бүгүнкү күндө бүткүл Кыргызстан боюнча ипотекалык турак жайларды куруу активдүү жүрүп жатканын баса белгиледи. Бишкекте алгачкы үч турак жай комплекси ийгиликтүү аяктады, ал эми Жалал-Абад облусунда жеңилдетилген ипотекалык шарттарда жарандарга берилген эки көп кабаттуу үй курулду.
Калый Молдобасанов көчөсүндө жайгашкан 15 кабаттуу турак жай комплекси 225 батирди камтыйт. Комплекстин аймагында автономдуу жылытуу системасы, балдар аянтчасы жана жер алдындагы унаа токтотуучу жай каралган.
Садыр Жапаров жарандарды турак жай менен камсыз кылуу мамлекеттин эң башкы жана артыкчылыктуу милдеттеринин бири экенин белгиледи.
“Бүгүн биз жөн гана көп кабаттуу үйлөрдүн бүткөрүлүшүнө күбө болбостон, мамлекет жүргүзүп жаткан турак жай саясатынын иш жүзүндөгү жыйынтыктарын, үзүрүн көрүп жатабыз. Бул заманбап жана ыңгайлуу көп кабаттуу үй “Менин үйүм” программасынын алкагындагы дагы бир чоң ийгилик”, — деди президент.
“Менин үйүм” турак жай программасы жарандардын реалдуу муктаждыктарын учурунда чечүүгө багытталган механизмге айланды. Бүгүнкү күндө бул программага катышып, турак жай алуу үчүн кезекке тургандардын саны 58 миңден ашты. 10 миңден ашуун үй-бүлө үйлүү болду.
Мамлекет башчысы өз сөзүндө бул программа аркылуу Кыргызстанда жалпысынан 70 миңге жакын батирдин курулушу башталып, алардын басымдуу бөлүгү активдүү фазада турганын белгиледи.
“Мамлекеттик ипотекалык компания алдыдагы 5 жыл ичинде муктаж болгон жарандарыбызды турак жай менен толук камсыз кылууну максат кылып жатат. Бул чоң пландар жарандардын үй-жай маселелерин чечүүгө багытталган иштин бир бөлүгү гана. Ош, Баткен, Жалал-Абад, Ысык-Көл, Нарын, Талас, биягы Кара-Балтадан Токмокко карай үйлөрдүн салынышы кызуу жүрүүдө”, — деп баса белгиледи Садыр Жапаров.
Ал ошондой эле турак жай курулушу стратегиялык жана узак мөөнөттүү мүнөзгө ээ экенин, ошондуктан мамлекет мүмкүн болушунча көп жарандар өз үйүнө ээ болушу үчүн жаңы, сапаттуу жана жеткиликтүү турак жайларды курууну улантаарын өзгөчө белгиледи.
Президент шаарлардан кийин айылдарда да турак жайлар курулуп, 25 жылга чейинки мөөнөт менен ипотекага берилерин ырастады.
Буга байланыштуу ал райондордун жана шаарлардын жетекчилерине кайрылып, аларды жеке кызыкчылыктардан жана коррупциялык көрүнүштөрдөн кайтып, бош жаткан жерлерди турак үйлөрдү куруу үчүн Мамлекеттик ипотекалык компанияга өткөрүп бергиле деди.
