“Кыргыз Республикасынын Президентин жана Жогорку Кеңештин депутаттарын шайлоо жөнүндө” конституциялык Мыйзамынын талаптарына ылайык, шайлоо алдындагы үгүт иштери талапкерлерди каттоонун мөөнөтү аяктагандан кийин, башкача айтканда добуш берүү күнүнө 20 күн калганда расмий башталат.
Учурда ЖМКларда, интернет-басылмаларында жана социалдык тармактарында азыртан эле талапкерлерди колдогон посттор, сүрөттөр, видеолор, чакырыктар, билдирүүлөр жарыяланууда. Бул мыйзам бузуу катары каралат. Конституциялык Мыйзамдын 22-беренесинин 10-бөлүгүндө төмөнкүлөр шайлоо алдындагы үгүт деп таанылат деп көрсөтүлгөн:
1) тигил же бул талапкер үчүн добуш берүүгө же болбосо аларга каршы добуш берүүгө үндөөлөр;
2) айрым талапкерлерге карата колдоону билдирүү;
3) талапкерди шайлоонун же шайлабай коюунун мүмкүн болуучу кесепеттерин баяндап жазуу;
4) талапкерлердин, алардын кесиптик иштерине же алардын өздөрүнүн кызматтык (кызмат орундук) милдеттерин аткарууларына байланышпаган ишмердиги жөнүндө маалыматтарды таратуу.
Конституциялык мыйзамда кимдер үгүт иштерине катышат, кимдер катыша албастыгы так көрсөтүлгөн. Ал нормаларга ылайык, мамлекеттик жана муниципалдык кызматкерлер (Жогорку Кеңеш менен жергиликтүү кеңештеринин депутаттарын кошпогондо) үгүт иштерине катыша албайт. Конституциялык мыйзамдын талаптарын бузгандар үчүн бир нече чаралары каралган. Шайлоо комиссиялары жана башка мамлекеттик органдар эскертүү, айып пул салуу, андан ары талапкерди шайлоодон четтетүүгө чейин чараларды көрүшү мүмкүн, (бузуулар жөнүндө кодекстин 65-беренеси).
Шайлоо алдындагы үгүт иштерине журналисттер, блогерлер, жеке жарандар катыша алышат. Мыйзам талабына ылайык сөзсүз түрдө талапкер менен макулдашуу жана келишимдин негизинде, талапкердин шайлоо фондунан каржылануу шарты менен гана үгүт ишин жүргүзө алышаарын дагы бир ирээт эсиңиздерге салабыз. Ошондой эле социалдык тармактын колдонуучулары дагы ушул эле тартипти сактоосу зарыл, (22-берене,11-бөлүк). Ошондуктан, шайлоонун үгүт иштеринин так белгиленген мөөнөттөрү жана жол-жоболору бар экенин эске алуу менен, бардык маалымат каражаттарын, блогерлерди, жарандарды жана социалдык тармактардын колдонуучуларын мыйзамдын талаптарын сактоого чакырабыз!
