Кечээ, 21-февралда Кыргызстан менен Тажикстан чек ара боюнча тарыхый келишимге жетишти. Документке Бишкекте эки өлкөнүн УКМК башчылары Камчыбек Ташиев менен Саймумин Ятимов кол коюшкан.
«Кыргызстан менен Тажикстандын элдери үчүн өзгөчө, тарыхый күн! Биз чек ара маселесине чекит койдук. Башкача айтканда, кыргыз-тажик чек арасы боюнча жыйынтык протоколуна кол койдук», — деген Ташиев.
Бул боюнча социалдык тармактын колдонуучуларынын пикирин топтодук.
Эркин журналист Ыдырыс Исаков төмөндөгүдөй пост жазды.
«Кыргыз-тажик чек ара маселесин чечип коюу мүмкүнчүлүгү Акаевде чоң болгон. Тажикстандагы жарандык согушту токтотууга кошкон салымынан тапкан кадырынан да, Тажикстандагы саясий, экономикалык алсыздыктан да пайдалана турган абал эле. Акаев ошол мүмкүнчүлүктү эч камырабай колдон чыгарган. Муну мен жоопкерчиликсиздик деп эле атайм. Мындай болорун билген эмес, сезген эмес деп, аны актоого болбос. Анткени ошо Акаев учурунда эле Өзбекстан кыргыз-өзбек чек арасын дээрлик өз алдынча чечип аткан. Ошол сигналдарды дээрлик кенеген эмес. Ошентсе да Каркыра менен Үзөңгү-Кууштан улам Акаев “жер саткан” деп аталды.
Атамбаевде чек ара боюнча уруша кетмей, айтыша кетмейден башка оозго алар эч жылыш болбоду. Эстеп айтар эч нерсе жок. Жээнбеков “жер сатар” деген сөздөн оттой коркчу окшойт. Имиштерге караганда ал “чек ара тууралуу мага эч нерсе угузбагыла” дечү экен.
Жапаров бийлигинде кыргыз-өзбек чек арасы чечилди. Тынч эле жерден атыша кетмейлер акыры токтоду. Эки ирет чыккан жаңжалдан кийин акыркы эки жылдан бери Баткен тараптан суук кабар тыйылды. Баткенде кайсы участок кимге өткөнүн билбейм, бирок араны ачык кылып алганыбыз жакшы деп эсептейм. Эртең Баткенге бир жолу барып көрбөгөндөр же өлкөнүн наркы четинде туруп алып “жер кетти” деп, “кайгыргандар” чыкпай койбос. Ошол “жер сатар” деген эски ат буларга да тагылар. Бирок эки дос жоопкерчиликти алышты. Менимче кыргыз-тажик чек арасынын кандай чечилгенин баткендиктер, болгондо да чек аралаш жерде жашагандар гана жакшы түшүнүшөт», — деп жазды ал.
