Кечээ, 9-апрелде УКМК төрагасы Камчыбек Ташиев абхаз, армян номурлуу унаалардын ээлеринин өкүлдөрү менен жолукту. Бул тууралуу УКМКдан билдиришти.
Буга чейин социалдык тармактарда абхаз, армян номурлуу унаалардын айрым ээлери унааларды мыйзамдаштыруу процесси боюнча өлкө жетекчилигине кайрылуу жолдошкон.
Мындан улам, УКМК төрагасы Садыр Жапаровдун тапшырмасы менен кайрылуу жолдогон жарандар менен жолугуп, алардын үнүн укту.
Транспорт каражаттарын жана айдоочулук курамды каттоо боюнча мамлекеттик агенттик сунуштаган тиешелүү токтомдо унааларды легалдаштыруу 15-мартта башталып, сентябрдын ортосунда жыйынтыкталары жазылган. Армян, абхаз номурлуу унаалардын ээлери бул убакыт ичинде унаасын легалдаштыруу үчүн агенттиктин аймактык бөлүмдөрүнө кайрылышы керек болгон.
Биринчи кезекте документи бар унаалар мыйзамдаштырылат. Экинчи этапта документи жок, бирок техникалык абалы талаптарга жооп берген унаалар каттоого алынары маалымдалган. Мыйзамдаштыруунун баасы 100 миң сом деп белгиленген.
Жыйындын жүрүшүндө Абхазиядан, Армениядан ташылып келген унаа ээлери аталган сумма көп экенин айтып, арзандатып берүү өтүнүчүн билдиришти. Ошондой эле, унааларга катталган аймагына жараша номур берүүнү жана каттоо процессиндеги айрым көйгөйлөргө токтолушту.
Өз кезегинде УКМК төрагасы Камчыбек Ташиев учурда буга чейин бекитилген токтомго ылайык, тийиштүү мамлекеттик органдар тарабынан чаралар көрүлүп жатканын кабарлады. Жарандарга түшүнүксүз болуп жаткан айрым маселелер боюнча тийиштүү жетекчилерди сынга алды.
Ошондой эле, төрага алдыда чет өлкөлүк номерлүү унааларга чыккан токтомго өзгөртүүлөр киргизилерин маалымдады. Анда абхаз, армян номурлуу унааларды мыйзамдаштыруунун баасы, кыймылдаткыч көлөмүнө жараша унааларга 50 миң сомго төмөндөтүлдү. Ал эми унаа токтотуучу жайга күнүнө 100 сом эмес, 50 сом деп каралды. Тийиштүү лабороториялык текшерүүнүн баасы 2800 сомдон 1000 сомго түшүрүлдү. Ал эми Чек ара кызматынан берилүүчү аныктама жокко чыгарылды. Муну менен жарандарга жеңилдиктер берилди.
УКМК төрагасы тийиштүү мекемелрдин жетекчилерине жогоруда айтылган маселелерди тез арада чечүү тапшырмасын берип, унааларды мыйзамдаштыруу процессин да кечеңдетпей жоопкерчилик менен кароону тапшырды.
