24 жаштагы Рамис 96 жаштагы чоң апасын багат. Ал чоң энесине тамак жасап берет, сейилдейт, чачын өрөт, жуунтат жана күн кечке кобурашып жанында. Чоң эне менен неберенин жүрөк жылыткан видеолорун интернетте көп адам көрүп, баары бир ооздон жигитке алкыш айтып жатышат. “Ата-энем эки ажырым жолго түшкөндөн кийин чоң энемдин колунда өстүм. Кезинде ал да мага ушинтип кам көргөн. Эми менин кезегим дейт” каарманыбыз.
«Мен кичинекей кезде ата-энем ажырашып кетишкен. Ошондон бери апам багып, чоңойткон. 11-класска чейин чоң апамдын колунда болдум. 2022-жылы апам ооруп калды. Бишкекке алып келдик. Туберкулёз дешти. Ага чейин апам аябай тың болчу, ошондо тамак ичпей, эч нерсе жакпай калды. Туугандар коркуп, «бул оору жугуп калат» дешти. Бирок менде коркуу сезими болгон жок. Мени чоң энем баккан, эми менин кезегим деп 6 ай ооруканада жаттык. Азыр 6 ай сайын ооруканага көрүнүп турушу керек. Ошол үчүн Бишкекке көчүп келгенбиз»,- деди ал.
