24 жаштагы Рамис 96 жаштагы чоң апасын багат. Ал чоң энесине тамак жасап берет, сейилдейт, чачын өрөт, жуунтат жана күн кечке кобурашып жанында. Чоң эне менен неберенин жүрөк жылыткан видеолорун интернетте көп адам көрүп, баары бир ооздон жигитке алкыш айтып жатышат. “Ата-энем эки ажырым жолго түшкөндөн кийин чоң энемдин колунда өстүм. Кезинде ал да мага ушинтип кам көргөн. Эми менин кезегим дейт” каарманыбыз.
«Ооругандан кийин өзү кийине албай калды. Ал учурда мен жаңы жумушка киргем. «Апам ооруп жатса, эмнеге мен акчанын артынан куушум керек» деп ойлодум. Баарын жыйыштырып койдум. Апама шаарда оор эле болуп жатат. Анткени айылда жашаган да буга чейин, эшикке чыкса деле эч ким сүйлөшпөйт. 1 сааттай болобуз, кайра киребиз. Башка туугандар деле карамак, бирок мени угат. «Тамак ичиңиз» десем, ичет. Ооруганда тамакка болгон табити жоголуп, эч нерсе ичпей калган. Салмагы да түшүп кеткен. Калганын тоготпойт. 2 кызы чет өлкөдө жашашат, чалып, акча салып турушат. Неберелери келип, көңүлүн ачып кетишет»,- деди ал.
