Дене тарбия жана спорт мамлекеттик агенттигинде жана анын түзүмдүк, ведомстволук бөлүмдөрүндө 2024-жылга бюджеттин аткарылышына жүргүзүлгөн шайкештик аудитинин жыйынтыгында финансылык тартипти камсыз кылуу боюнча көзөмөл жетишсиз деңгээлде жүргүзүлгөндүгү аныкталды. Бул тууралуу Эсептөө палатасынан маалымдашты.
Жалпысынан 4 416,4 миң сом финансылык бузуулар аныкталып, анын 1 234,4 миң сому ордуна коюлууга тийиш болсо, аудит учурунда 462,2 миң сом бюджетке калыбына келтирилди. Бузуулардын негизги бөлүгү эмгек акыга мыйзамда каралбаган төлөмдөрдөн (2 706,3 миң сом) жана командировкалык чыгымдар боюнча ашыкча төлөмдөрдөн (1 224,2 миң сом) түзүлгөн. Ошондой эле 485,7 миң сом чыгымдар тиешелүү документтер менен тастыкталбагандыгы белгиленди. Мындан тышкары, 25 331,5 миң сомго жол-жоболук бузуулар аныкталып, алардын ичинде эмгек акы эсептөөдө, бухгалтердик эсеп жүргүзүүдө жана мамлекеттик сатып алууларда мыйзам талаптарынын бузулушу орун алган. Айрым активдер эсепке алынбаганы, дебитордук жана кредитордук карыздар толук чагылдырылбаганы, ошондой эле коммуналдык чыгымдар боюнча лимиттен ашык пайдалануу фактылары аныкталды.
Аудиттин жыйынтыктары Эсептөө палатасынын Кеңешинде каралып, финансылык тартипти күчөтүү, аныкталган бузууларды жоюу жана бюджеттик каражаттарды натыйжалуу пайдалануу боюнча тиешелүү тапшырмалар берилди.
