Жогорку Кеңештин депутаты Алишер Козуев Ош облусунун Кара-Суу районундагы Жоош айыл өкмөтүнө караштуу Кум-Арык – Зарбалык – Мамажан унаа жолунун расмий ачылыш аземине катышты.
Жалпы узундугу 4,1 чакырымды түзгөн бул жол аймактын инфраструктурасын өнүктүрүүгө багытталган маанилүү долбоорлордун бири болуп саналат. Иш-чарада сөз сүйлөгөн депутат жалпы тургундарды кубанычтуу саамалык менен куттуктап, долбоорду ишке ашырууга колдоо көрсөткөнү үчүн президент Садыр Жапаровго, Транспорт министрлигине жана жергиликтүү мекеме-ишканаларга ыраазычылыгын билдирди.
Мындан тышкары, эл өкүлү жергиликтүү тургундарды Кара-Суу районунун 90 жылдык мааракеси жана Улуу Жеңиштин 80 жылдыгы менен куттуктап, бул тарыхый окуялар элдин биримдигин жана ынтымагын мындан ары да бекемдей турганын белгиледи. Андан соң, депутат Алишер Козуев Улуу Ата Мекендик согушта курман болгондордун элесине таазим кылып, эстеликке гүл чамбар койду.
Белгилей кетсек, аталган иш-чарага Кара-Суу райондук мамлекеттик администрациясынын жетекчиси, акимдин биринчи орун басары Арзибек Жусупов, Жоош айыл өкмөтүнүн башчысы Айбек Балтабаев, айыл тургундары, аксакалдар жана аймактагы мекеме-ишканалардын кызматкерлери катышышты.
