Жогорку Кеңештин Эл аралык иштер, коргоо, коопсуздук жана миграция боюнча комитетинин төрагасынын орун басары Эльдар Сулайманов Бишкек шаарында өтүп жаткан Борбор Азия өлкөлөрүнүн парламенттер аралык III форумунун 1-сессиясында сөз сүйлөп, «Миграция жана эмгек агымдары: жарандардын укуктарын мыйзамдык жактан камсыз кылуу жана экономиканын туруктуулугу» аталышындагы темада баяндама жасады.

Алгач өлкөдөгү миграция саясаты тууралуу учкай кеп кылган Эльдар Сулайманов 2021-жылы Кыргыз Республикасынын 2030-жылга чейинки миграциялык саясатынын концепциясы бекитилгенин эске салып, анын негизинде бир катар мыйзамдык реформалар ырааттуу түрдө ишке ашырылып жатканын билдирди.

«Алсак, чет өлкөлүк жарандардын өлкөдө мыйзамдуу жүрүүсүн жеңилдеткен бирдиктүү уруксат жана резидент-карта киргизилди. Урматтуу президентибиз Садыр Жапаровдун атайын жарлыгы менен «миграциялык мунапыс» жүргүзүлүп, 10 миң адам өлкөдө жүрүүгө укук алды жана 3 миңге жакыны өз ыктыяры менен чыгып кетти. Бул чаралар миграциялык көзөмөлдү күчөтүү менен бирге чет элдиктердин да укуктарынын корголушуна өбөлгө түзөт», — деди эл өкүлү.

Ошондой эле учурда 685 миңге жакын кыргыз жараны чет жакта жашап жатканын белгилеген депутат алардын укуктарын жана кызыкчылыктарын коргоо жаатында өнөктөш мамлекеттер менен жигердүү иштер улантылып жатканын айтып: «Үстүбүздөгү жылдын биринчи жарымында эле жарандарга 16 миңден ашык консулдук кызмат көрсөтүлүп, 100 миңден ашык кайрылуу каралды. Онлайн документ тапшырууга мүмкүндүк берген «Электрондук консул» тутуму ишке киргизилди. «VFS Global» компаниясы менен кызматташтык кеңейтилип, дипломатиялык өкүлчүлүктөрүбүз жок мамлекеттерде да кыргызстандыктарга кызмат көрсөтүүгө шарт түзүлдү», — деп кошумчалады.

Мындан тышкары Кыргызстанга кайтып келген мигранттар үчүн гранттарды караган «Мекеним 1+1» сыяктуу программалар, жарандарга чет өлкөдө иштөөгө даярданууга жана мекенине келгенде адаптацияланууга жардам берген атайын борборлор ачылганын белгилеген эл өкүлү өлкөгө квалификациялуу кадрлардын келишине жана инновациялык экономиканын өнүгүшүнө шарт түзүүгө багытталган масштабдуу демилгелер да ишке ашырылып жатканын маалымдады.